Փաստ ինֆո

Մեծ դժգոհություն ունեմ նախաքննության ընթացքից։ Լրագրողների հետ զրույցում այս մասին ասաց «ՎԵՏՕ» շարժման հիմնադիր Նարեկ Մալյանը՝ անդրադառնալով Ռեստարտ նախաձեռնության անդամների և իր գործին։ 

Հիշեցնենք, որ մարտի 4-ի գիշերը Նարեկ Մալյանը ֆեյսբուքյան իր էջում գրել էր, որ «Ռեստարտ»-ի անդամների կողմից ենթարկվել է հարձակման։ «Ռեստարտ»-ի անդամները նշել էին, որ իր ֆեյսբուքյան ուղիղ եթերներում Մալյանը մշտապես վիրավորանքներ էր հնչեցնում իրենց հասցեին: Անդամներից Դավիթ Պետրոսյանի խոսքով՝ ի պատասխան հնչեցրած վիրավորանքների՝ փորձել են Մալյանին գցել աղբամանը, ապա՝ տարածել նաև միջադեպի վերաբերյալ տեսագրությունը։

«Կան անձինք, որոնց անձն այդպես էլ նախաքննության ընթացքում չհաջողվեց պարզել։ Նախաքննության ընթացքում մեղադրյալներից մեկի խափանման միջոցի առկայության պայմաններում թույլ տվեցին սահմանը հատել և գնալ Թբիլիսի՝ մասնակցել այնտեղ հրահրված ցույցերին։ Սորոսի կողմից հիմնադրված և ֆինանսավորվող Ռեստարտ խուլիգանախմբի 6 անդամներին մեղադրանք է առաջադրված առևանգման համար և նրանց սպառնում է 4-ից 8 տարվա ազատազրկում։ Այսինքն նրանք ըստ էության մեղադրվում են ծանր հանցագործություն կատարելու մեջ, սակայն նրանք նույնիսկ մեկ օր ճաղերի հետևում չեն անցկացնել»,-նշեց Նարեկ Մալյանը։

Նրա խոսքով նախաքննության ընթացքում ամբողջությամբ ապացուցված է մեղադրանքը և չկա ինչ-որ հատված, որը բացատրության և ապացուցման հավելյալ կարիք է զգում. «Տարածքը տեսանկարահանվել է։ Տեսանկարահանվել է նաև ամբողջ ընթացքը, թե ինչքան ժամանակ առաջ են եկել, դարանակալել և իրենց գործողություններն ինչպես են համակարգել, որից հետո խուլիգանախմբի անդամները լրատվամիջոցում խոսել են ու պատմել, որ ամեն ինչ կազմակերպված է։ Ըստ էության որևէ նոր բան ապացուցելու կարիք չկա»,-նշեց Նարեկ Մալյանը։

Աղբյուր` Փաստինֆո