Փաստ ինֆո

Զարգացվում է այն ծրագիրը, որը նախկինում հայտարարվել է։ Այն է՝ կողմերը պետք է հումանիտար ծրագրերով առաջ գնան և ստեղծեն այն բարենպաստ մթնոլորտը, որտեղ հնարավոր է անցնել հիմնական բանակցային փուլին։ Լրագրողների հետ զրույցում այս մասին ասաց «Իմ քայլը» խմբակցության պատգամավոր Հովհաննես Իգիթյանը՝ անդրադառնալով Հայաստանի և Ադրբեջանի ԱԳ նախարարների վերջին հանդիպմանը։ Հովհաննես Իգիթյանն ընդգծեց, որ հայտարարության մեջ ամենակարևորն այն է, որ կոնֆլիկտի լուծումն այլընտրանք չունի բացի խաղաղ լուծման տարբերակից։

«Մենք գիտենք Ադրբեջանի ցանկությունը, տեսել ենք նրա գործողությունները, բայց ինձ թվում է՝ Ադրբեջանին հիմա այս իրավիճակում շատ դժվար կլինի փորձեր անել այդ հարցը լուծել ռազմական ճանապարհով։ Հայտարարության մեջ նշված է, որ ավելի քիչ լարվածություն է շփման գծերում, բայց այդ քիչ լարվածությունը մեզ չի բավարարում։ Մենք պետք է հասնենք այն մակարդակի, որ որևէ կրակոց կամ պայմանավորվածության խախտում Ադրբեջանի կողմից՝ ունենա քաղաքական համապատասխան գնահատական թե՛ Մինսկի խմբի, թե՛ այլ կազմակերպությունների կողմից»,-ասաց Հովհաննես Իգիթյանը։ Ըստ նրա՝ կողմերը բանակցում են, թե ինչպես սկսել բանակցությունները և այստեղ շատ կարևոր է Հայաստանի մոտեցումը, այն է՝ բանակցային սեղանի շուրջ ԼՂ-ի վերադարձը.

«Լավրովն իր համապատասխան ելույթով անուղղակի համաձայնություն տվեց, որ ԼՂ-ն պետք է բանակցային փուլին մասնակից, այսինքն մենք բանակցային փուլը կհամարենք այն ժամանակ, երբ հաշվի կնստեն ԼՂ-ի ցանկությունների հետ»,-նշեց պատգամավորը։

Դիտարկմանը, որ Ադրբեջանը պնդում է, եթե Արցախը բանակցային սեղան գա, այդ դեպքում պետք է բանակցային սեղան գա նաև ԼՂ ադրբեջանական համայնքը, պատգամավորն ասաց, որ ժամանակին, երբ տարբեր ձևաչափերով մասնակցել է բանակցային փուլին, հիշում է՝ ԵԱՀԿ-ն արդեն կողմնորոշվել էր, որ սեղանի շուրջ պետք է նստեն երեք կողմերը՝ Հայաստանը, Լեռնային Ղարաբաղը և Ադրբեջանը. «Ադրբեջանը նսեմացնելու համար ԼՂ-ի ներկայությունը, իր հետ բերում էր ԼՂ-ի ադրբեջանական համայնքը և մենք պայքարում էինք, որովհետև կարգավիճակ չունեին։ Ի՞նչ է հիմա փոխվել։ Վարչապետը հայտարարել է, որ որևէ խնդիր չի տեսնում, որ ԼՂ-ի ադրբեջանական համայնքը գա Ալիեւի հետ՝ պատվիրակության մեջ։ Միևնույն է կգան նրանք, թե ոչ՝ Ալիևը ներկայացնում է այդ մարդկանց, որովհետև աշխարհում ներկայացուցչական այլ ձև չկա, քան ընտրություններում ընտրելու ձևը։ Այսինքն` այս մարդիկ ընտրել են նախագահ Ալիևին, որը կներկայացնի նրանց շահերը»,-հավելեց Հովհաննես Իգիթյանը։

Աղբյուր` Փաստինֆո