Փաստ ինֆո

«Որեւէ պարագայում ՀԴՄ չխփելու հանգամանքը 2020 թվականին հունվարի մեկից վերանում է»,-քիչ առաջ ֆեյսբուքյան ուղիղ եթերից հայտարարեց ՀՀ վարչապետ Նիկոլ Փաշինյանը։

Նա ասաց, որ Նոր Տարվա զանգերը խփելուց հետո ՀՀ-ում չի լինելու ՀԴՄ չխփելու որեւէ պարագա, որը բարոյական, սոցիալական կամ որեւէ այլ առումով ներման ենթակա կլինի։

«ՀԴՄ կտրոնների նոր վիճակագրության եւ 2020 թվականի մեր անելիքների մասին»,-վերնագրով ուղիղ եթերից Նիկոլ Փաշինյանը հայտարարեց, որ կառավարության նպատակը մարդկանց հարկային պարտավորությունների տակ մտցնելը չէ։ Նրա խոսքով, 2020 թվականի բյուջեի նախագծով հարկային եկամուտներն ավելացել են 356 միլիարդ դրամով։ «Սա ամբողջ պոտենցիալը չէ, ստվերային տնտեսությունը կրճատելու, բյուջեի եկամուտները ավելացնելու համար պետք է խիստ պայմանավորվածությունների գնանք»,-հայտարարեց Փաշինյանը։

Նա ասաց, որ փոքր օբյեկտներում ՀԴՄ չխփելու արդյունքում իրական ստվեր է գոյանում նաեւ խոշոր ձեռնարկություններում, որոնք հաշվարկային փաստաթղթերը չգրելը պայմանավորում են նրանով, որ փոքրերը չեն ուզում այդ փաստաթղթերով աշխատել։ Ըստ Փաշինյանի, այսկերպ իրենք նաեւ խոշորներով են զբաղվում

«ՀԴՄ չխփող գործարարը գողանում է զինվորի հացը, այս տարի տեսաք՝ մենք մեր բանակում հսկայական փոփոխություններ ենք արել, մի մասի մասին դուք գիտեք մյուս մասի մասին չգիտեք»,-շարունակեց Փաշինյանը՝ հավելելով. «Փոքր ձեռնարկատերերը թող իմանան՝ ՀԴՄ կտրոն չխփելու համար լինելու է լուրջ վարչական պատասխանատվություն, դա լինելու է զինվորի հացը, զինվորի փամփուշտը, զինվորի արժանապատիվ հագուստը գողանալու համար»։

Նիկոլ Փաշինյանը հիշեցրեց, որ ընդամենը 2 օր առաջ ՊԵԿ 6 աշխատակից է ձերբակալվել։ Ըստ նրա, իշխանությունը լրջորեն պայքարում է կոռուպցիայի դեմ՝ հանուն ՀՀ բարեկեցության։

Նիկոլ Փաշինյանը ՀԴՄ-ներով աշխատելու ուղերձը համարեց հայ ժողովրդի համախմբվածության ու միասնականության դրսեւորման հնարավորություն։ Վերջում ասաց, որ սիրում է բոլորիս հպարտանում է մեզնով, խոնարհվում է բոլորիս առաջ ու ծառայում ՀՀ-ին ու ՀՀ հպարտ ու արժանապատիվ քաղաքացուն։

Աղբյուր` Փաստինֆո