Փաստ ինֆո

Ազգային ժողովն առաջին ընթերցմամբ 83 կողմ դեմ 33 ձայներով ընդունեց ՍԴ դատավորներին վաղ կենսաթոշակի ուղարկելու օրինագիծը։

Օրինագծով նախատեսվում է ներդնել ՍԴ դատավորների կամավոր վաղ կենսաթոշակի դիմելու ինստիտուտը։ Համաձայն օրինագծի՝ նախատեսվում է մինչև 2020 թվականի հունվարի 31-ը ՍԴ դատավորի հրաժարական ներկայացնելու դեպքում նրա լիազորությունները դադարելուց մինչև սահմանադրությամբ սահմանված պաշտոնավարման տարիքը լրանալը, ստանում է կենսաթոշակ հրաժարականի պահին ստացած պաշտոնային դրույքաչափի և հավելաչափի չափով։
ԱԺ «Լուսավոր Հայաստան» և «Բարգավաճ Հայաստան» խմբակցությունները նախապես հայտնել էին՝ դեմ են քվեարկելու օրինագծին։
«Բարգավաճ Հայաստան» խմբակցության պատգամավոր Գևորգ Պետրոսյանը նկատեց՝ սխալ է Սահմանադրական դատարանից սկսել, որովհետև այսօր ՍԴ-ի ծառայություններից օգտվում է քաղաքացիների մեկ երրորդը, իսկ ընդհանուր. «Սա անձերի դեմ մղվող օրենք է, այլ ոչ թե ինստիտուցիոնալ համակարգի»,-հավելեց Գևորգ Պետրոսյանը։

ԱԺ պատգամավոր Արման Բաբաջանյանն ասաց, որ հեռու է այն մտքից, որ այս նախագիծը լուծելու է ՍԴ-ի շուրջ ճգնաժամը, բայց միանում է «Իմ քայլը» դաշինքին և կողմ է քվեարկելու։

«Իմ քայլը» խմբակցության ղեկավար Լիլիթ Մակունցն ընդգծեց, որ նպատակը մեկն է՝ զարգացնել, կայացնել ինստիտուտները, կատարել խորքային բարեփոխումներ. «Մեր կարծիքով այս քայլը նպաստելու է դրան։ «Իմ քայլը» խմբակցությունն ունի առաջարկներ առաջինից երկրորդ ընթերցման ընթացքում որոշակի խմբագրական շտկումներ կատարելու վերաբերյալ»,-հավելեց Լիլիթ Մակունցը։

ԱԺ «Լուսավոր Հայաստան» խմբակցության պատգամավոր Անի Սամսոնյանն էլ ասաց. «Դուք այս ամբիոնից Ձեր գիտելիքներով ջարդուփշուր արեցիք ՍԴ-ն, բայց այդպես էլ մեզ չկարողացաք բացատրել, որ եթե նրանք այդքան վատն են, ինչու ենք մենք նրանց բարձր կենսաթոշակով, պատվով ուղարկում հանգստի։ Դուք մեզ չհամոզեցիք, որքան էլ փորձեցիք ամբիոնի մոտ միկրոֆոնը ծռել»,-նշեց Անի Սամսոնյանը։

Աղբյուր` Փաստինֆո