Փաստ ինֆո

ԵՊՀ արհեստակցական կազմակերպությունն այսօր հայտարարություն է տարածել՝ ահազանգելով համալսարանում սպասվելիք զանգվածային կրճատումների մասին։ 

Կազմակերպության նախագահ Արմեն Ավետիսյանի ստորագրությամբ հայտարարության մեջ նշվում է, որ ԵՊՀ ռեկտորի ԺՊ Գ. Գևորգյանի կողմից վերջին շրջանում իրականացվում են ԵՊՀ արհեստակցական կազմակերպության գործունեությանը խոչընդոտող գործողություններ և որ ճնշումների նպատակը անձնակազմին աշխատանքից ազատելը հնարավորինս հեշտ և անաղմուկ դարձնելն է, քանի որ արհմիության անդամ չհանդիսացող աշխատողին աշխատանքից ազատելու դեպքում արհմիությունը չի կարող խոչընդոտ հանդիսանալ։

Այս կապակցությամբ «Փաստինֆո»-ի թղթակիցը զրուցել է ԵՊՀ ռեկտորի պաշտոնակատար Գեղամ Գևորգյանի հետ։

-Պարոն Գևորգյան, ԵՊՀ արհկոմիտեն այսօր հայտարարություն էր տարածել առ այն, որ դասախոսներին, ամբիոնի վարիչներին և այլ աշխատողներ ստիպում են դուրս գալ արհմիության շարքերից։ Նշում էր Ձեր ղեկավարությամբ են իրականացվում ճնշումները։

-Ոչ, այդպիսիք չկան։

-Հայտարարության մեջ ասվում է, որ օպտիմալացման անվան տակ զանգվածային կրճատումներ են սպասվում։

-Ինչ-որ մեկն ինչ-որ հայտարարություն է արել, ես այն չեմ տեսել, պետք է մեկնաբանե՞մ։

-Կարող ենք ավելի ուշ զանգահարել, որպեսզի ծանոթանաք հայտարարությանը։

-Ես այդ հայտարարությանը ծանոթանալու ցանկություն չունեմ։

-Այսինքն՝ լարվածություն կա՞ ձեր հարաբերություններում։

-Մենք որևէ հարաբերություն չունենք։

-Իսկ կրճատումներ, այնուամենայնիվ, սպասվու՞մ են։

-Այս պահին որևէ բան չկա, իսկ եթե անհրաժեշտություն լինի կարող է կրճատվեն, ի՞նչ կա որ։ Դա ոչ առաջին անգամն է, ոչ վերջին։

-Ասվում է, որ ԵՊՀ աշխատողներին հորդորվում է արհմիությունից դուրս գալ, որպեսզի աշխատանքից ազատելը հնարավորինս հեշտ լինի, քանի որ արհմիության անդամ չհանդիսացող աշխատողին աշխատանքից ազատելու դեպքում արհմիությունը չի կարող խոչընդոտ հանդիսանալ։

-Ինչ-որ մեկը մի հիմարություն ասել է, Դուք էլ ուզում եք հիմա ես մեկնաբանե՞մ։

Հեղինակ՝ Սոնա Գեւորգյան

Աղբյուր` Փաստինֆո