Փաստ ինֆո

ՀՀ Հանրային խորհրդի անդամ, քաղաքագետ Ստյոպա Սաֆարյանի հեռախոսը գողանալու դեպքի առթիվ հարուցվել է քրեական գործ՝ կողոպուտի հատկանիշներով՝ՀՀ քրեական օրենսգրքի 176-րդ հոդվածի 1-ին մասով ։ Այս մասին «Փաստինֆո»-ին հայտնեց ՔԿ դեպարտամենտի տեղեկատվության և հասարակայնության հետ կապերի բաժնի պետի պաշտոնակատար Նաիրա Հարությունյանը։ «Քրեական գործով մեղադրյալի դատավարական կարգավիճակ ունեցող անձ չկա։ Նախաքննությունը շարունակվում է»,- ասաց նա։

Ավելի վաղ տեղեկացրել ենք, Ստյոպա Սաֆարյանի հեռախոսի հափշտակությունը տեղի է ունեցել սեպտեմբերի 6-ին։ Ըստ նրա հայտարարության՝ ժամը 22։50-ի սահմանում, իր բնակարանի մուտքի դռան մոտ անծանոթ 2 անձ մոտեցել են իրեն, որոնցից մեկը մեջքից հրել է, իսկ մյուսը ձեռքից բացահայտ հափշտակել «iPhone 8» տեսակի բջջային հեռախոսը և դիմել փախուստի։

Դրանից օրեր անց սոցցանցերում տարածվեց Ստյոպա Սաֆարյանի և վարչապետի մամուլի խոսնակ Վլադիմիր Կարապետյանի միջև մի նամակագրություն՝ սոցիալական ցանցում «կեղծ օգտատերեր» պահելու, այդ նպատակով գումարի հատկացման եղանակի ու աղբյուրների մասին:

Ստյոպա Սաֆարյանը հայտարարեց, թե նման խոսակցություն չի եղել, որ իր հեռախոսը գողացել էին, իսկ զրույցի բովանդակությունն էլ, իբր կեղծված է եւ որ հանցագործության մասին հաղորդում է ներկայացրել ԱԱԾ և ՀՀ ոստիկանություն՝ պահանջելով անհապաղ հայտնաբերել կեղծիքի հեղինակներին, պարզել նրանց առնչությունը իր վրա կատարված հարձակման ու հեռախոսի առևանգման հետ։

«Փաստինֆո»-ի հարցմանն ի պատասխան պարզվեց, որ ենթադրյալ կեղծիքի հեղինակները չեն պարզվել. թե ոստիկանությունից եւ թե քննչական կոմիտեից հայտնեցին, որ ենթադրյալ նամակագրության հրապարակման դեպքի առթիվ քրեական գործ չի հարուցվել եւ այն քննության առարկա չի դարձել։

Ստեփան Սաֆարյանը պնդում է, որ կեղծ օգտատերեր պահելու համար ֆինանսավորում հատկացնելու մասին վարչապետի խոսնակի հետ չի խոսել. սկանդալային սքինշոթերի հետքերով

Հեղինակ՝ Իզաբել Սահակյան

Աղբյուր` Փաստինֆո