Փաստ ինֆո

Նախօրեին Հայաստանի 8 մարզերի 16 համայնքներում տեղի ունեցած ՏԻՄ ընտրությունների արդյունքները վկայում են, որ իշխող քաղաքական թիմը լրջորեն չի մոտենում համայնքային ընտրություններին։

«Փաստինֆո»-ի հետ զրույցում նման կարծիք հայտնեց քաղտեխնոլոգ Արմեն Բադալյանը։ Ըստ նրա, «Իմ քայլը»-ում ի տարբերություն «Հանրապետական»-ի, այլ մեթոդ են ընտրել՝ թեեւ իշխող ուժը նշում է, որ իր նպատակն այն չէ, որ ՀՀԿ-ի նման բոլոր համայնքներում իրենց ներկայացուցիչները լինեն, սակայն փորձում է ուժեղացնել մարզպետի իշխանությունը եւ համայնքները միավորելով խնդիրներ լուծել։

«Դուք տեսաք, որ Իջեւանի քաղաքապետի ընտրությունները , որոնք դեկտեմբերին պետք է տեղի ունենային, հետաձգվեցին, որպեսզի համայնքները միավորվեն եւ մոտ 17-18 համայնք միանգամից համայնքի ղեկավար ընտրեն։ Սրանով իշխող ուժը ցանկանում է մեկ կրակոցով մի քանի նապաստակ սպանել, մասնավորապես, խոշորացնելով համայնքը, միանգամից աշխատում են համայնքի վրա եւ անուղղակի համայնքները վերցնում հսկողության տակ, ոչ թե ՝ գյուղ առ գյուղ»,-նշեց Բադալյանը։

Արմեն Բադալյանը միունույն ժամանակ շեշտեց՝ սա ցույց է տալիս, որ գաղափարական ուղղվածություն չունեցող «Իմ քայլը»-ն իրականում չունի մարդկային ռեսուրս, որովհետեւ 10 հոգի կարող է գտնել, բայց 100 հոգի չի կարող։

«Քանի դեռ ամբողջ Հայաստանում հները պարտվել են, նորերը չեն եկել, այդ վտանգը չկա, որպեսզի իրենք վախենան եւ մտածեն յուրաքանչյուր համայնքում իրենց մարդիկ ունենալու մասին »,- ասաց քաղտեխնոլոգ Արմեն Բադալյանը։

Հիշեցնենք, դեկտեմբերի 8-ին Հայաստանի 8 մարզերի 16 համայնքներում անցկացվեցին ՏԻՄ ընտրություններ։ Որոշ համայնքներում վերընտրվել են նախկին անկուսակցական համայնքապետերը, իսկ օրինակ, Արարատի մարզում իշխող ուժը պարտություն է կրել։ Մասնավորապես, մարզի Տափերական համայնքում 8 թեկնածուներից 441 ձայնով հաղթել է անկուսակցական թեկնածուն:

Այս հանգամանքը քաղտեխնոլոգը բացատրում է նրանով, որ ցածր է ռեգիոնալ չինովնիկի վարկնիշը։ «Դա երկար չի կարող շարունակվել, երբ կայունանա քաղաքական դաշտը, համայնքային ընտրությունները մի փոքր այլ կլինեն»,-նկատեց քաղտեխնոլոգը։

Նա պատահական չհամարեց, որ իշխանափոխությունից հետո շատ համայնքապետեր, որոնք նախկինում ՀՀԿ-ական էին, դարձան անկուսակցական եւ այդ անունը իրենց նախընտրական ծրագրերից հանեցին։ Ինչ վերաբերում է առհասարակ համայնքային ընտրություններին, ըստ քաղտեխնոլոգի, այս պահի դրությամբ Հայաստանի կուսակցական համակարգը նույնպես մեծ ուշադրություն չի դարձնում ՏԻՄ ընտրություններին։

Դրա պատճառները մի քանիսն են, այդ թվում ՝ համայնքների փոքրությունը եւ մարդկային ռեսուրսի բացակայությունը։ «Համայնք կար, որ թեկնածուն ինքն իրեն պարտվել էր , եթե չեմ սխալվում, 9 կողմ ձայներ էր ստացել, 13-14՝ դեմ։ Սրանք փոքրիկ համայնքներ են, որոնց կուսակցությունները մեծ ուշադրություն չեն դարձնում եւ իրենցից չեն ներկայացնում մեծ վարչական լծակ»,-ասաց Արմեն Բադալյանը։

Մյուս կողմից, ըստ Բադալյանի, ՏԻՄ ընտրություններին ընդամենը 2-3 կուսակցություն է մասնակցում,ինչը մեծ հաշվով կուսակցական համակարգի խնդիր է։

«Եթե նայենք արդարադատության նախարարությունում գրանցված կուսակցություններին, դրանք շատ են, բայց միայն 1, 2, 3 կուսակցություն ունի ցանցային կառուցվածք եւ կարող է ընտրություններին մասնակցել, իսկ մեծ մասը «մահացած» մարդ-կուսակցություններ են։ Այնպես, որ կուսակցությունները չունեն թեկնածուներ»,-եզրափակեց քաղտեխնոլոգը։

Աղբյուր` Փաստինֆո