Փաստ ինֆո

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը պատրաստվում է դիմել Վճռաբեկ դատարան։ Այս մասին «Փաստինֆո»-ի հետ զրույցում ասաց Հայկ Ալումյանը՝ նշելով, որ բողոքի փաստաթղթերն արդեն պատրաստ են։ «Համաձայն չենք Տիգրան Սահակյանի որոշումների հետ, որի համաձայն՝ բողոքը պետք է ուղարկվեր ոչ թե Վերաքննիչ, այլ Վճռաբեկ։

Տիգրան Սահակյանը չէր ասել, որ նոր հանգամանքներով դատական ակտի վերանայման վարույթի հարուցելու հիմքեր չկան, այլ ասել էր դիմել Վճռաբեկ դատարան։ Մենք համամիտ չենք իր հետ և դրա համար բողոքարկում ենք իր որոշումը։ Երկրորդ փաստաթուղթը՝ դիմում ենք Վճռաբեկ, ինչպես Տիգրան Սահակյանն էր ասել»,-նշեց Ալումյանը։ Ավելի վաղ հայտնել ենք, որ Վերաքննիչ քրեական դատարանի դատավոր Տիգրան Սահակյանը մերժել է Ռոբերտ Քոչարյանի փաստաբան Հայկ Ալումյանի բողոքը՝ նոր հանգամանքով դատական ակտի վերանայման վարույթի հարուցելու մասին։

Այսպես՝ 2019 թվականի նոյեմբերի 15-ին Վերաքննիչ դատարանում ստացվել է պաշտպան Հայկ Ալումյանի վերաքննիչ բողոքը, որով խնդրել է նոր հանգամանքի՝ ՀՀ Սահմանադրական դատարանի 15.10.2019 թվականի ՍԴՈ-1480 որոշման հիմքով հարուցել թիվ Ռոբերտ Քոչարյանի խափանման միջոցը փոփոխելու միջնորդությունները քննության առնելու մասին Առաջին ատյանի դատարանի 2019 թվականի սեպտեմբերի 20-ի կայացված որոշման վերանայման վարույթ:

Փաստաբանը խնդրել էր վերանայել Առաջին ատյանի դատարանի 2019 թվականի սեպտեմբերի 20-ի կայացված որոշումը, այն բեկանել, փոփոխել, Ռ.Քոչարյանի նկատմամբ որպես խափանման միջոց ընտրված կալանքը վերացնել և նրան ազատ արձակել կալանքից, հակառակ դեպքում՝ գրավի կիրառումը ճանաչել թույլատրելի և որոշում կայացնել Ռ.Քոչարյանին կալանքից գրավով ազատ արձակելու մասին, սահմանելով գրավի ողջամիտ չափ:

«Ուսումնասիրելով պաշտպան Հայկ Ալումյանի բողոքը և ստացված քրեական գործի հավելվածը՝ Վերաքննիչ դատարանը գտնում է, որ նոր հանգամանքով դատական ակտի վերանայման վարույթի հարուցումը պետք է մերժել»,- նշված է Տիգրան Սահակյանի դեկտեմբերի 2-ի որոշման մեջ՝ նշելով, որ վիճարկվող դատական ակտը նոր հանգամանքի հիմքով վարույթ հարուցելու լիազորությամբ օժտված է ՀՀ վճռաբեկ դատարանը։

Հեղինակ՝ Իզաբել Սահակյան

Աղբյուր` Փաստինֆո