Փաստ ինֆո

Դատավորը ցանկանում է ինքնաբացարկ հայտնել, թե չի ցանկանում, դա չպետք է քննարկենք։ Պետք է քննարկենք արդյոք կան իրավական հիմքեր, թե ոչ և ըստ էության անաչառ դիտորդի մոտ մենք չենք տեսնում, որ տվյալ հրապարակումը, ինչի վրա քրեական գործ էր հարուցվել, կարող է դատավորի անաչառությանը կասկած առաջացնել։ Լրագրողների հետ զրույցում այս մասին ասաց ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանը՝ անդրադառնալով դատավոր Մխիթար Պապոյանի ինքնաբացարկին։

«Այն, ինչ ներկայացված է եղել դատական նիստի ժամանակ, իմ գնահատմամբ դրանցից որևէ մեկը չէր կարող դիտարկվել որպես ինքնաբացարկի հիմք։ Կստանանք դատարանի որոշումը և երբ կունենանք հիմնավորումները, ավելի վերջնական գնահատական կտամ։ Բայց դատարանը պետք է ինքնաբացարկի հարցը քններ այն ինֆորմացիայի շրջանակներում, ինչը ներկայացվել է դատական նիստի շրջանակներում, որովհետև եթե այլ ինֆորմացիա է հիմք ծառայել, ենթադրվում է, որ դատարանը վարույթ ընդունելու փուլում դեռևս ինքնաբացարկ պետք է հայտներ»,-նշեց Արամ Օրբելյանը։

Դիտարկմանը, որ եթե ԱԱԾ-ում քննություն է իրականացվում, արդեն հիմք չէ, որ դատավորն ինքնաբացարկի գնա, Արամ Օրբելյանն արձագանքեց. «Իհարկե ոչ, որովհետև միակ հանգամանքը, որ պետք է քննարկենք այն է, թե ինչ գործ է քննվում ԱԱԾ-ում։ Այնտեղ քննվում է գործ, որ ոմն Արտակ զրպարտել է դատավորի, չի քննվում դատավորն է գրել ինչ-որ վճիռ, թե ոչ, չի քննվում դատավորը խախտում է կատարել, թե ոչ, քննվում է գործ՝ արդյոք ոմն Արտակ զրպարտել է դատավորին, թե ոչ։ Այդ գործի շրջանակներում չի քննվում արդյոք դատավորն իրականացրել է ինչ-որ գործողություններ, թե ոչ։ Հետևաբար` այդ գործի շրջանակներում քննվելու է հետևյալը՝ արդյոք Արտակ Գալստյանը ֆեյսբուքյան գրառում կատարելու ժամանակ տիրապետել է բավարար քանակի օբյեկտիվ տվյալների, որը իր մեղքը կբացառի և հնարավորություն կտա նրան իրականությանը չհամապատասխանող տեղեկություն գրել և նրան չզրպարտել»,-նշեց փաստաբանը։

Արամ Օրբելյանն ընդգծեց, որ ինքնաբացարկի միջնորդության քննարկման շրջանակներում զրպարտության և գործի առկայությունը չպետք է որևէ կերպ կաշկանդի արդարադատության իրականացմանը, հակառակ դեպքում փաստաբանի խոսքով ստացվում է, որ ցանկացած դատավոր, ում որոշումները կարող է կողմերից մեկի սրտով չլինել կարող է շատ հանգիստ կազմակերպի ցանկացած զրպարտչական բնույթի ցանկացած հոդված։

Հարցին՝ ում սրտով չէին Մխիթար Պապոյանի որոշումները, Արամ Օրբելյանը պատասխանեց. «Եթե ուշադիր լսեցիք դատական նիստի ժամանակ հնչեցված կարծիքները, անաչառության կոնցեպտը հետևյալն էր՝ ցանկացած դատարան, որն ի օգուտ Ռոբերտ Քոչարյանի որոշում է կայացնում, անաչառ չէ։ Եթե ուշադիր լինեք Սեդա Սաֆարյանի, մեղադրող դատախազների ելույթները հետևյալն էին՝ ցանկացած դատավոր, ով որոշում է կայացնում և ինչ-որ ձևով բավարարում է Ռոբերտ Քոչարյանի ինչ-որ մի պահանջը, անաչառ չէ»,-նշեց Արամ Օրբելյանը։

Հեղինակ՝ Հասմիկ Կոշկարյան

Աղբյուր` Փաստինֆո