Փաստ ինֆո

Սահմանադրական դատարանին մեղսակից եմ համարում վերջին 20 տարիների պետության բռնազավթման գործում մասնակցության համար։ Ազգային ժողովում ՍԴ դատավորների վաղ կենսաթոշակի ուղարկելու օրինագծի քննարկման ժամանակ այս մասին ասաց ԱԺ պատգամավոր Արման Բաբաջանյանը։

«Այս դատարանին մեղսակից եմ համարում առնվազն 2003 թվականից սկսած ընտրական վեճերի վերաբերյալ որոշումներին հաջորդող քաղաքական հետապնդումների, քաղաքական բռնաճնշումների, քաղաքական կուսակցությունները ջարդուփշուր անելու, սպանությունների, հետապնդումների անուղղակի մասնակցության մեջ։ Այս դատարանին անուղղակի մասնակից եմ համարում Մարտի 1-ի սպանդի, Մարտի 1-ին կատարված սպանությունների համար, հետևաբար դեմ եմ, որ այստեղ քննարկենք ՍԴ-ի այս հանցագործ անդամներին վաղաժամ կենսաթոշակի հնարավորության հարցը»,-ասաց պատգամավորը, այնուհետև դիմելով Արդարադատության նախարար Ռուստամ Բադասյանին՝ հետաքրքրվեց՝ ինչ է կարծում այդ իրադարձություններին ՍԴ դատավորների մեղսակցության մասին։

Ռուստամ Բադասյանի կարծիքով ՀՀ-ում մարդու իրավունքների հիմնարար խախտման, կոռուպցիայի բարձր մակարդակի, դատաիրավական բարեփոխումներ չանելու, նման բարեփոխումները ձախողելու և մի շարք այլ հարցերում մեղավորություն ունեն տարբեր պետական կառույցներ. «Եթե մի փոքր ավելի փիլիսոփայենք, մեղավորություն ունենք նաև մենք՝ քաղաքացիներս, որ հանդուրժել ենք այդ վարքագիծը, բայց ՍԴ այն անդամներինն, որոնց առաջարկվում է վաղ կենսաթոշակի դիմելու մեխանիզմը չեմ համարում հանցագործներ, նման հայտարարություն անելու համար հիմք չունեմ։ Նախագծի իմաստը կայանում է նրանում, որ սա ձեռքսեղմում է պետության և ՍԴ այն անդամների միջև, որ արձանագրում ենք՝ չպետք է խոչընդոտ լինեն ՍԴ-ի նոր մոդելի ձևավորման ճանապարհին։ Թույլ տվեց սկզբունքորեն չհամաձայնել Ձեզ հետ, որ գործ ունենք հանցագործների հետ»,-ասաց նախարարը՝ պատասխանելով Արման Բաբաջանյանի հարցին։

Ռուստամ Բադասյանն ընդգծեց, որ ոչ թե հասնելու են նրան, որ ՍԴ-ում որևէ խնդիր լուծվի, այլ ամբողջ դատական համակարգի նկատմամբ վստահությունն ամրապնդվի։

Աղբյուր` Փաստինֆո