Փաստ ինֆո

«Ինչ-որ մի մարդ դատավորի մասին ինչ-որ տեղեկություն է տարածել, քանի որ դատավորն էլ դիմել է այդ անձի նկատմամբ քրեական գործի հարուցելու պատճառով եւ քանի որ գործը հարուցվել է, ապա դատավորը չի կարող անաչառ քննել»,-ՀՀ 2-րդ նախագահ Ռոբերտ Քոչարյանի պաշտպանական թիմի անդամ Հայկ Ալումյանը լրագրողների հետ ճեպազրույցում այսպես ներկայացվեց մեղադրող կողմի՝ դատավոր Մխիթար Պապոյանին ինքնաբացարկ ներկայացնելու հիմնավորումները։

Ըստ փաստաբանի, եթե դա պետք է չափանիշ դիտվի, նշանակում է՝ ցանկացած մեկը ցանկացած գործով կարող է այս իրավիճակը ստեղծել։
Ալումյանը շեշտեց՝ դատախազությունը վստահ չէ, թե դատավորը ինչ որոշում կկայացնի, ի տարբերություն դատավոր Արմեն Դանիելյանի դեպքի, երբ դատախազությունը նախապես գիտեր, իսկ տվյալ դատավորի հետ կապված այդ վստահությունը չունեն այնպես, ինչպես պաշտպանական կողմը։ «Հիմա արհեստական փաստարկներով փորձում են հասնել նրան, որ դատավորն ինքնաբացարկ հայտնի»,-ասաց Ալումյանը։

Նրա խոսքով, մեծ հաշվով, ցանկացած դատավոր ցանկանում է այս գործը չքննել եւ այստեղ 2 շահ կարող են համընկնել։

«Դուք հիշում եք չէ՞, երբ Քոչարյանի գործը 1-ին ատյան էր գնացել, ըստ էության, քննվելու, քանի դատավոր տարբեր հիմքերով ինքնաբացարկ հայտնեցին, ուղղակի ձերբազատվեցին այս գործից։ Դատավորը, իմանալով, թե ինչեր կարող են իր հետ տեղի ունենալ, եթե փորձի օբյեկտիվ քննել եւ օբյեկտիվ լուծում տալ գործին՝ կձգտի ընդհանրապես առնչություն չունենալ այս գործին»,-ասաց նա։

Ալումյանն ասաց՝ մտահոգությունն ոչ թե այն է, որ դատախազության միջնորդությունը կարող է հիմնավոր լինել, այլ հակառակը, ծայրահեղ անհիմն, մտացածին եւ շատ վատ նախադեպ կարող է ստեղծվել։ «Մյուս կողմից ես հասկանում եմ, որ ցանկացած դատավոր, պարոն Պապոյանին նկատի չունեմ, եթե իմանում է, որ այս գործի հետ կապված որեւէ հարց ինքը պետք է լուծի, բացասական է ընդունում լուրը՝ նկատի ունենալով զարգացումները։ Փաստաբանը ստեղծված իրավիճակում, չբացառեց դատավորի կողմից գործն , այսպես ասած իր վրայից գցելու հնարավորությունը։

Հայկ Ալումյանը նաեւ նշեց, որ դատավոր Մխիթար Պապոյանը բարձր վարկանիշ ունեցող դատավոր է, ինչը որոշակի հույս է տալիս, որ նա կարող է չգնալ օրենքի խախտման ՝անգամ ճնշումների առկայության պայմաններում։ Բացի այս, Հայկ Ալումյանն ասաց, որ սա առաջին անգամն է, երբ պաշտպանական կողմին թույլատրվեց ներկա գտնվել քրեական գործի մակագրման գործընթացին եւ այս պարագայում նրա անաչառությունը կասկածի տակ դնելու ամենաքիչ պատճառներն ունեն։

Հիշեցնենք, ՀՀ երկրորդ նախագահ Ռոբերտ Քոչարյանի նկատմամբ գրավ կիրառելու գործով Վերաքննիչ քրեական դատարանը՝ դատավոր Մխիթար Պապոյանի նախագահությամբ, հեռացել է խորհրդակցական սենյակ՝ քննարկելու մեղադրող կողմի ներկայացրած դատավորին ինքնաբացարկ հայտնելու միջնորդությունը։

Աղբյուր` Փաստինֆո