Փաստ ինֆո

«Վերջին 48 ժամում մենք հայկական իշխանություններից չենք կարողանում որեւէ հոդաբաշխ պատասխան ստանալ, թե ի վերջո ինչ է տեղի ունեցել Բրատիսլավայում, ինչ օրակարգի շուրջ է եղել այս հանդիպումը»,- լրագրողների հետ հանդիպմանը հայտարարեց «Ադեկվադ» միաբանության անդամ Կոնստանտին Տեր-Նակալյանը՝ անդրադառնալով ՀՀ եւ Ադրբեջանի ԱԳ նախարարների հանդիպմանը։

Նրա խոսքով, Հայաստանի ԱԳՆ-ն ամեն գնով փորձում է հրամցնել, որ եղել են ոչ թե բանակցություններ, այլ «կոնսուլտատիվ բնույթի հանդիպումներ», մինչդեռ մյուս կողմերը՝ Ադրբեջանն ու ԵԱՀԿ ՄԽ համանախագահները նշում են, որ հենց բանակցություններ են ընթացել։

Կոնստանտին Տեր-Նակալյանը ասաց, որ վերջին 1-1.5 տարվա զարգացումների համադրությունը թույլ է տալիս ներկայացնել, որ բանակցային գործընթացում ստեղծվել է ծայրաստիճան ոչ հայանպաստ իրավիճակ։ Ըստ նրա, լավատեսություն ներշնչող չէ ոչ միայն Ադրբեջանի, այլեւ ԵԱՀԿ ՄԽ դիրքորոշումը եւ այս իրավիճակում, անհասկանալի է, թե ինչով է զբաղված հայկական կողմը։

Նա նշեց, որ հայկական կողմը ուշացումով է արձագանքում ադրբեջանական վերջնագրին։ «Ադրբեջանական դեսպանատունը հրապարակել էր մի տեքստ, որը դժվար է անվանել այլ կերպ, քան կապիտուլյացիայի պահանջ»,-ասաց նա։

Նա նաեւ շեշտեց, որ ԱԳ նախարար Զոհրաբ Մնացականյանի հայտարարության բանավոր տեքստն ու հրապարակված պաշտոնական սղագրությունը չեն համապատասխանում իրար։ Բանավոր տեքստից բացակայում է առանցքային ձեւակերպում, այն է՝« Արցախն ունի իրեն և իր ժողովրդին պաշտպանելու լիարժեք կարողություն։ Հայաստանը շարունակում է մնալ Արցախի անվտանգության միակ երաշխավորը»։

Կոնստանտին Տեր-Նակալյանը նշեց, որ ԱԳՆ-ն փորձեց սա մատուցել որպես վրիպակ։

Հիշեցնենք, որ դեկտեմբերի 4-ին Բրատիսլավայում տեղի ունեցավ Հայաստանի և Ադրբեջանի ԱԳ նախարարների հանդիպումը։ ԵԱՀԿ Մինսկի խմբի համանախագահող երկրների պատվիրակությունների ղեկավարները համատեղ հայտարարություն տարածեցին՝ կողմերին կոչ անելով առանց հետաձգումների եւ պայմանների առարկայական բանակցությունների անցնել։

Աղբյուր` Փաստինֆո