Փաստ ինֆո

«Վերահաս ճգնաժամից և կատաստրոֆայից խուսափելու համար Փաշինյան-Մնացականյան զույգը կրկին բռնվեց Սերժ Սարգսյան-Էդուարդ Նալբանդյան զույգի կողմից մշակված բանակցային փաթեթից որպես փրկօղակ, եթե դիտարկենք Մնացականյանի վերջին ելույթը, որտեղ 3 ժողովուրդներին հետ կապված հայտնի մտքից զատ, տպավորություն կար, որ Էդուարդ Նալբանդյանն է խոսում մեզ հետ և ոչ թե Զոհրաբ Մնացականյանը»,-  այսօր հրավիրված ասուլիսում ասաց ՀՀԿ փոխնախագահ Արմեն Աշոտյանը։

Նա հարց բարձրացրեց, թե ինչ կարիք կար 1,5 տարի կորցնել, քայքայել բանակցային դիրքերն ու մեծամտանալ, ասել, թե ամեն ինչ գիտեմ, Արցախի հարցին տիրապետում եմ, սկսում եմ բանակցային գործընթացը՝ սեփական կետից, և ապա որպես փրկօղակ օգտագործել Սերժ Սարգսյանի թողած քաղաքական ժառանգությունը։

«Եթե վերնագիր է պետք, ապա այսպես կարող ենք ասել՝ Սերժը փրկեց Նիկոլին։ Արցախյան հարցի բանակցային գործընթացում Բրատիսլավայի քննարկումն այնուհանդերձ մշուշոտ է, որովհետև կա հստակ դիսոնանս մինչև ԵԱՀԿ մինսկի խմբի համանախագահների շրջանակներում բանակցային գործընթացը տեղեկատվական ու քաղաքական հոսքերի և ապա վերջնարդյունքը։ Պետք է հասկանալ՝ ինչ է կատարվել այնտեղ, ես ունեմ վարկածներ, որոնք այս պահին չեմ ուզում բարձրաձայնել, բայց կարծում եմ, որ իրեն թափանցիկ հռչակած իշխանությունունը պարտավոր է մեզ բացատրել՝ ինչ կատարվեց Բրատիսլավայում, ինչ էիք խոստացել և ում էիք խոստացել Բրատիսլավայից առաջ, ինչու այդ հանդիպումն այդպես էլ որևէ ռեալ կերպ չներկայացվեց հանրությանը և ինչ կատարվեց»,-ասաց ՀՀԿ փոխնախագահը։

Անդրադառնալով Մինսկի համանախագահների հայտարարությանը՝ Աշոտյանն ասաց, որ այն պարունակելով հայկական կողմի համար որոշ վիճահարույց կետեր վերջին մեկ ու կես տարվա ընթացքում թողարկվածներից լավագույնն է. «Որովհետև կրկին շեշտված են կարգավորման սկզբունքները, հատկապես ժողովուրդների ինքնորոշման իրավունքը, որովհետև կրկին խոսվում է 2009-2012թթ Մինսկի խմբի համանախագահ երկրների ղեկավարների համատեղ հայտարարությունների բաղկացուցիչ մաս լինելու մասին, կրկին խոսվում է 2016թ-ին ձեռք բերված պայմանավորվածությունների կատարման կարևորության մասին, թեպետ այստեղ, ցավոք սրտի, խոսվում է հատվածական...»։

Աշոտյանը նշեց, որ ՀՀ իշխանությունը պետք է դադարի հասարակությունն ու քաղաքական դաշտը բաժանել յուրայինների ու թշնամիների. «Պետք է հրապարակավ հայտարարել, որ Հայաստանի նորագույն պատմության մեջ զեբրայի, այն է սև ու սպիտակի դարաշրջանն ավարտված է, սա շատ կարևոր է, որպեսզի Արցախյան ճակատում սպասվող դիվանագիտական և ավաղ գուցե ոչ միայն դիվանագիտական զարգացումներին ընդառաջ, հայ ժողովուրդը լինի հնարավորինս կոնսոլիդացված։ Այս փաթեթի բաղադրիչ մասն է նաև ՀՀ քաղաքական դաշտը ֆորմատի ենթարկելու անհրաժեշտությունը»։

Մանրամասները՝ տեսանյութում։

Աղբյուր` Փաստինֆո