Փաստ ինֆո

«Այսօրվա Հայաստանում այսպիսի ճոխություններ թույլ տալ չենք կարող, որքան էլ Հայաստանը նոր է, համենայն դեպս այս ծախսերը բավականին ճոխ են մեզ համար»-այս մասին այսօր Երևանի ավագանու նիստի ժամանակ ասաց «Բարգավաճ Հայաստան» խմբակցության անդամ Հռիփսիմե Առաքելյանը։

Հիշեցնենք, որ Երևանի ավագանու դեկտեմբերի 6-ի արտահերթ նիստի օրակարգում այսօր ընդգրկված էր միայն մեկ հարց: Քննարկվում էր մայրաքաղաքում Ամանորի տոնական միջոցառումների համար նախատեսված գումարը 270 միլիոն դրամով ավելացնելու նախագիծը, որն էլ ավագանու հավանությունը ստացավ 41 կողմ, 5 դեմ և 2 ձեռնպահ ձայներով։

Առաքելյանը նշեց, որ Երևանն անընդհատ համեմատվում է հարևան Թբիլիսիի հետ. « Դե մեր հարևան Թբիլիսիի լուսավորությունն այսպես է, Թբիլիսին այսքան տոնածառ ունի, մենք այսքան տոնածառ ունենք...երբ ես ուսումնասիրեցի, թե Թբիլիսիում ինչ ծախսեր են արվում և զբոսաշրջային շարժն ինչպիսին է, հասկացա, որ Թբիլիսիում այսօր զբոսաշրջության բում է։ Ես մեծ ակնկալիք ունեմ , որ Երևանում էլ կկարողանանք օրերից մի օր այդ բումն ապահովել, բայց, ինչպես ասում են, մենք վերմակը պետք է մեր ոտքի գյորա գցենք»։

Նա հարցրեց՝ արդյոք գաղափարների գեներացման ու նորացման խնդիր կա, որ մեկ այլ քաղաքի լուծումներն են փորձ արվում իրականացնել Երևանում։
«Թբիլիսիում նոր տարուն ինչ որ պետք է տեղի ունենա, նույնությամբ արվում է մեզ մոտ և դրա համար որոշել ենք, դե որ իրենք դա անում են մենք ումի՞ց ենք վատը, եկեք մենք էլ սա անենք, մենք էլ տոնածառներ դնենք, մենք էլ լույսերը շատացնենք, կառավարությանն ասենք մեզ փող տվեք, որ մեր ծախսերն անենք»,-ասաց Առաքելյանը։

Նա ընդգծեց, որ Թբիլիսին նույնականացվում է Երևանի հետ, ապա պետք է հաշվի առնել, որ Թբիլիսիի քաղաքապետը մասնավոր հատվածին է ներգրավում ամանորյա տոնակատարությունների համար։

«Մասնավոր հատվածը մասնակցում է դրան, տարբեր նվիրատվություններ է անում, կամազ չեն նվիրում, մի երկու տոնածառ են նվիրում, որը շատ ընդունելի է»,-դիմելով քաղաքապետին ասաց «Բարգավաճ Հայաստան» խմբակցության անդամը։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո