Փաստ ինֆո

Հայաստանի Հանրապետությունն այսօր համաշխարհային մակարդակով ունի ամենացածր գնաճներից մեկը։ Այս մասին Ազգային ժողովում իր եզրափակիչ ելույթի ժամանակ հայտարարեց ՀՀ վարչապետ Նիկոլ Փաշինյանը։

«Պարենի համաշխարհային կազմակերպությունն արձանագրել է, որ ամբողջ աշխարհում սննդամթերքի գներն աճել են շուրջ 6 տոկոսով, ՀՀ-ում սննդամթերքն աճել է ընդամենը 0.1 տոկոսով։ Ի՞նչ կապ ունի այս ամենի հետ կառավարությունը։ Կապը շատ ուղիղ է։ Մենաշնորհների հաղթահարման առումով այսօր մեզ հաջողվում է գնաճը պահել աննախադեպ կայուն և աննախադեպ ցածր մակարդակի վրա։ Ընդ որում Հայաստանն աշխարհի այն քիչ երկրներից է, որտեղ օրինակ այս սեպտեմբերին այս սեպտեմբերին նախորդ տարվա դեկտեմբերի համեմատությամբ գնանկում է արձանագրվել»,-նշեց Նիկոլ Փաշինյանը։

Նա արձանագրեց, որ սրանք լավ ցուցանիշներ են և հասկանալիորեն փորձ է արվում կասկածի տակ դնել որոշ ընդդիմախոսների կողմից։ Վարչապետը նկատեց պաշտոնապես հրապարակված այն թվերը, որոնք անկումներ են արձանագրում, ոգևորությամբ հիշատակվում են ընդդիմախոսների կողմից. «Օրինակ հունիսին, երբ մենք ընդամենը 3 տոկոս տնտեսական ակտիվության ցուցանիշ ունեինք, այդ 3 տոկոսը դարձել էր հակահեղափոխական դրոշ մեզ ու Ձեզ հայտնի անձանց ձեռքին»,-նշեց վարչապետը։

Նա ընդգծեց, որ ՀՀ-ում միջազգային պահուստները 2019 թվականի հոկտեմբերի դրությամբ գտնվում են պատմական բարձր մակարդակի վրա, ընդ որում 2018 թվականի նույն ամսվա համեմատ աճել են 386 մլն դոլարով կամ 19 տոկոսով։

Նիկոլ Փաշինյանի խոսքով ՀՀ կառավարությունն այսօր փակում է երեսնամյա ԱԱՀ-ի գործարար հանրության ունեցած պարտքը. «56 մլրդ դրամ մենք հատկացնում ենք, հուսահատ պարտք ընդ որում։ Ասում են ներդրումային միջավայր։ Մարդը, որ հույս չի ունեցել, որ էդ փողը վաղուց գրել են սառույցին, մենք գնում ենք ասում ենք՝ եղբայր կարող ա փող է Ձեզ պետք կամ պարտք ենք Ձեզ։ Մենք Ձեզ պարտք չենք, նախկին, նախկին, նախկին կառավարությունները, բայց մենք փակում ենք էդ պարտքը։ Սա վիճակագրական տող չի, սա կոնկրետ փող է, որ գնում է կոնկրետ մարդկանց»,-հավելեց վարչապետը։

Նա նկատեց՝ այսօր շինարարական բոլոր կազմակերպությունները ծանրաբեռնված են. «Երբ ակնարկում ես, որ կարող է նոր պատվեր լինի, նոր տենդեր լինի, եկեք մասնակցեք, գույները քցում ա, ճնշումները բարձրանում ա, որովհետև այնքան գործ ունեն, չգիտեն արդեն իսկ վերցրած գործերի տակից ոնց դուրս գան»,-նշեց վարչապետը։

Աղբյուր` Փաստինֆո