Փաստ ինֆո

ԱԺ ԲՀԿ խմբակցության պատգամավոր Գևորգ Պետրոսյանը չի բացառում, որ Սերժ Սարգսյանի նկատմամբ քաղաքական հետապնդում է իրականացվում։ Այս մասին լրագրողների հետ ճեպազրույցում ասաց ԱԺ «Բարգավաճ Հայաստան» կուսակցության պատգամավոր Գևորգ Պետրոսյանը։ «Ես չեմ կարող ասել՝ իրենք ինչքանով են պարտք Սերժ Սարգսյանին, որ իրենք այսօր իշխանություն են, ինչքանով ունեն պարտավորություններ Սերժ Սարգսյանի առաջ։ Մի բան ճշմարտություն է՝ իշխանությունը զիջվեց անարյուն»,-ասաց Գևորգ Պետրոսյանը՝ նշելով, որ ծանոթ չէ Սերժ Սարգսյանին առաջադրված մեղադրանքի բովանդակությանը և չի կարող որպես իրավաբան գուշակություններով զբաղվել։

«Ես ասում եմ, որ իշխանությունը փոխվեց անարյուն և հույս ունեմ, որ այս իշխանությունն էլ, որ փոխվի, անարյուն լինի»,- ասաց Պետրոսյանը՝ շեշտելով, որ ոչ մի իշխանություն հավերժ չէ։ Պետրոսյանի խոսքով՝ կարող է լինել և՛ հերթական ընտրություններ, և՛ արտահերթ։ Նա նաև նկատեց, որ այսօր հասարակության մեջ աննախադեպ թշնամանքի մթնոլորտ է։ «Ոչ մեկ 2018թ.-ի հունվար ամսին չգիտեր, որ ապրիլ ամսին տեղի է ունենալու իշխանափոխություն։ Հիմա պետք չէ զբաղվել գուշակություններով »,- ասաց Պետրոսյանը։ Նա կարևորեց այն է, որ իշխանությունը հիշի, թե ինչու է եկել և ինչ է խոստացել, ինչ ծրագիր է ներկայացրել և, եթե ինչ-որ հարցերում էլ թերանում է, ապա գոնե չխոչընդոտի այն մարդկանց, ովքեր իրենց անձնական հեղինակությամբ նպաստում են հազարավոր խնդիրներից գոնե մի քանիսի լուծմանը։

Անդրադառնալով Սերժ Սարգսյանի ելույթին՝ Պետրոսյանը նշեց, որ այնպես չէ, որ Սերժ Սարգսյանի ելույթը գովեստ էր այս իշխանությունների հասցեին։ «Այնտեղ հնչեցին մեր իրավական անվտանգության խնդիրները, որը չէր կարող իշխանության քիմքին հաճելի լիներ։ Ես, լինելով իրավաբան,չեմ կարող հիմա այդպիսի պատասխանատու պնդում անել, որ Սերժ Սարգսյանի նկատմամբ քրեական գործի հարուցումը պայմանավորված է բացառապես քաղաքական շարժառիթներով։ Դա չի բացառվում, բայց այդպիսի պնդում անելու համար պետք է իրազեկված լինել»,- ասաց Պետրոսյանը՝նշելով, որ չի բացառում Սերժ Սարգսյանի նկատմամբ քաղաքական հետապնդումը։

Նրա խոսքով՝ անվերջ ձգվող վերջին դատավարությունները նախկին իշխանության գործելաոճն է և ներկայիս իշխանությունները ինչի մեջ մեղադրում էին նախկին իշխանություններին, հիմա նույն իրենք են անում։ «ժողովուրդն ասում է՝ այ ընկեր, մարդը մեղավոր է, բռնել ես՝ տար պատժի, բայց այսպես անվերջ ձգվող՝ կալանավորում, բաց թողում, գրավի դիմաց, անձնական երաշխավորում։ Լավ, այս շոուներով ինչքա՞ն կարող են ազգին կերակրել։ Ժողովուրդն ունի իր կյանքը բարելավված տեսնելու իրավունք։ Նա դրա համար է հեղափոխություն կամ իշխանափոխություն արել։ Եթե պետք է նախկին բարքերը նույն ձևով շարունակվեին, ոչ ոքին պետք չէր այս հեղափոխությունը, բացառությամբ՝ մի քանի մարդկանց, որոնց կենսապայմաններում նկատելի առաջընթաց է գրանցվել»,- նշեց Պետրոսյանը։

Հեղինակ՝ Իզաբել Սահակյան

Աղբյուր` Փաստինֆո