Փաստ ինֆո

Կրթության, գիտության, մշակույթի և սպորտի նախարար Արայիկ Հարությունյանը հայտարարել է, որ նախորդ իշխանություններին հետապնդելու են կոռուպցիոն գործերի հետ կապված և եթե ներկաներն էլ թաթախվեն կոռուպցիայի մեջ, ապա նրանք էլ զերծ չեն մնա հետապնդումներից։

«Դեռևս պետք է սահմանափակվել ԱԱԾ-ի տարածած հայտարարությամբ, քանի որ նախ ընդամենը մեկ օր է անցել և նաև կա անմեղության կանխավարկած, բայց միևնույն ժամանակ մենք հավատարիմ ենք մեր հանձնառությանը, որ ցանկացած դեպքում անկախ նրանից, թե տվյալ պաշտոնյան ով է՝ պատասխանատվության պետք է ենթարկվի»,-այս մասին այսօր լրագրողների հետ ճեպազրույցում ասաց ԿԳՄՍ նախարար Արայիկ Հարությունյանը, անդրադառնալով ԿԳՄՍ փոխնախարարի ձերբակալմանը։

Հիշեցնենք, որ խոշոր չափերով կաշառք ստանալու կասկածանքով երեկ բերման էր ենթարկվել ԿԳՄՍ փոխնախարար Գևորգ Լոռեցյանը։

Նա նշեց, որ չի ուզում տվյալ դեպքը մեկնաբանել միայն ԱԱԾ-ի հայտարարությամբ, որովհետև գոյություն ունի անմեղության կանխավարկած. «Երբ ինչ-որ որոշակի փուլում կլինենք և կարձանագրվի, որ դա իրոք փաստ է, ապա կմեկնաբանվի և համապատասխան եզրակացություններ կլինեն»։

Հարցին, հակասություն չէ՞ որ նա մասնակցում է հեղափոխությանը և պաշտոն ստանալուց հետո կասկածվում է այդ արարքի կատարելու համար՝ Հարությունյանը պատասխանեց. «Դուք խախտեցիք անմեղության կանխավարկածը, որի իրավունքը չունեք, բայց ցանկացած դեպքում երբ կոռուպցիա կլինի թաթիկները կկտրվեն։ Իմ ամեն երկրորդ ելույթը կոռուպցիայի մասին է և եթե չեմ սխալվում ամենաշատ քրեական գործերը մեր ոլորտում են հարուցվել»։
ԿԳՄՍ նախարարը տեղեկացրեց, որ երեկ նախարարությունում գործողություններ են իրականացվել, բայց քանի որ խոսքը քրեական գործի մասին է, չի կարող մանրամասներ հայտնել։ Նա նաև վերահաստատեց խոսքերը, թե նախորդներին հետապնդելու են կոռուպցիոն գործերի հետ կապված։

Հեղինակ՝ Սոնա Գեւորգյան

Աղբյուր` Փաստինֆո