Փաստ ինֆո

Սերժ Սարգսյանը և շատ ուրիշներ պետք է վաղուց պատասխանատվության կանչվեին և շատ ավելի լուրջ մեղադրանքներով։ Այս մասին «Փաստինֆո»-ի հետ զրույցում ասաց ԱԺ պատգամավոր Արման Բաբաջանյանը՝ հավելելով, որ սա դեռ սկիզբն է և ժամանակը սպասեցնել չի տա։

«Կարծում եմ, որ Սերժ Սարգսյանի վրա գործ կարելու կարիք չկա, որովհետև Սերժ Սարգսյանը քայլող գործերի հատորներ է»,- ասաց Բաբաջանյանը՝ հույս հայտնելով, որ նրա կատարած հանցագործությունները հերթով կբացահայտվեն։ Ըստ Բաբաջանյանի՝ Սերժ Սարգսյանի մեղսակցությունը կասկած չի հարուցում հանրության մոտ և կապացուցվի դատական կարգով։ Նրա կարծիքով՝ սա սկիզբ է Սերժ Սարգսյանի տեղաշարժը սահմանափակելու համար և գործերը կհամալրվեն, կամբողջանան։ «Խորապես համոզված եմ, որ նրա պաշտոնավարման ընթացքում՝ և՛ որպես վարչապետ, և՛ դրանից առաջ որպես ԱԱԾ տնօրեն, որպես ներքին գործերի նախարար, որպես պաշտպանության նախարար, եղել է պետության բռնազավթման շրջանակներում և տրամաբանության մեջ»,- ասաց Բաբաջանյանը՝ նշելով, որ այդ գաղափարաբանության շրջանակներում պետք է նրա հանցագործությունները փնտրել։ Բաբաջանյանի խոսքով՝ առաջադրված մեղադրանքն ինքնին վարկաբեկիչ է պետության ղեկավարի համար։

«Մարդ, ով ՀՀ նախագահի պաշտոնն է զբաղեցրել, նման հանցագործության մեջ մեղադրանքի արժանանալն արդեն մեծապես վկայում է, որ մեր պետության ներսում լուրջ խցանումներ են եղել և այդ խցանումները կապ ունեն Բաղրամյան 26-ի ամբողջ արատավոր համակարգի հետ, որը հիմք է դրվել Ռոբերտ Քոչարյանի օրոք, բայց խորացվել է Սերժ Սարգսյանի նախագահության ժամանակահատվածում»,- ասաց Բաբաջանյանը։ Ըստ Բաբաջանյանի՝ մարտի 1-ի իրադարձությունների գլխավոր շահառուն Սերժ Սարգսյանն է, ով պետք է առաջին օրվանից ներգրավվեր գործում։ «Գիտենք, որ այդ գաղտնի շտաբի ակտիվ մասնակիցը եղել է Սերժ Սարգսյանը»,- նշեց Բաբաջանյանը՝ հավելելով, որ հույս ունի, որ նա ինչ-որ մի պահից Մարտի 1-ի գործով կներգրավվի որպես մեղադրյալ։

Աղբյուր` Փաստինֆո