Փաստ ինֆո

30 տարի Հայաստանում կուտակված խնդիրները մեկ գործողությամբ հնարավոր չէ լուծել,- կառավարության այսօրվա նիստում հայտարարեց ՀՀ վարչապետ Նիկոլ Փաշինյանը։

Նրա խոսքերով՝ «Երբ մի խմբի, մի սուբյեկտի, մի բնակավայրի խնդիր լուծում ենք, պարտադիր «չուզող հարևանի» տրամաբանությամբ ի հայտ է գալիս մեկ այլ խումբ, բնակավայր, սուբյեկտ և ասում է՝ ինչու իր հարցը լուծեցիր և ոչ թե մեր հարցը լուծեցիր»,- ասաց ՀՀ վարչապետ Նիկոլ Փաշինյանը։
Ըստ վարչապետի՝ դա քաղաքակրթական և սոցիալ հոգեբանական խնդիր է և երբեմն տպավորություն է ստեղծվում, որ պետք է ընդհանրապես ոչինչ չանել, որ բոլորը հանգիստ, համակերպված հուսահատության հետ, իրենց յուղի մեջ տապակվեն։
Վարչապետն ընդգծեց, որ 30 տարի Հայաստանում կուտակված խնդիրները մեկ գործողությամբ հնարավոր չէ լուծել։

«Եթե մենք փորձենք մեկ գործողությամբ լուծենք բոլոր խնդիրները 100% հավանականությամբ մեր երկիրը կկանգնեցնենք կոլապսի և ձախողումների առաջ»,- ասաց վարչապետը։

Նիկոլ Փաշինյանի խոսքով՝ Հայաստանը միշտ էլ առանձնապես ուժեղ չի եղել շատ պրիմիտիվ մի քաղաքակրթական մեխանիզմում՝ հերթ կանգնելու գործում։
«Երբ որևէ տեղ որևէ ծառայություն է առաջարկվել, բոլորը աշխատել են հնարավորինս շուտ վազել և բռնել ծառայությունը մատուցողի կոկորդից, որ առաջինը հենց իրենց մատուցի»,- ասաց Նիկոլ Փաշինյանը՝ հավելելով, որ սա լուրջ քաղաքակրթական խնդիր է և ուրախ է, որ Հայաստանում սկսել է տարածվել հերթ արձանագրող մեքենաների օգտագործումը։
Մյուս քաղաքակրթական խնդիրը, որին անդրադարձավ Նիկոլ Փաշինյանը, շինարարական աղբն է։ Վերջինս նշեց, որ շինարարն առաջին հերթին պետք է իր շուրջը մաքրի և աշխատանքից առաջ, և հետո և այս առումով քաղաքաշինական տեսչությունն ունի շատ կոնկրետ անելիք։
«Չեմ հասկանում, թե ինչու պետք է շինարարությունում աշխատել, նշանակի աշխատել՝ տանից վերցված հին շորերով։ Այդ մարդիկ համազգեստ պետք է ունենան։ Դա նույնն է, որ մենք գանք Կառավարության նիստին, տանը ինչ մաշած շոր ունենք, հագնենք գանք ցնցոտիներով նստենք Կառավարչության նիստին»,- ասաց Նիկոլ Փաշինյանը՝ հավելելով, որ շինարարական ընկերությունները մեծ գումարներ են աշխատում և պետք է աշխատակիցներին տրամադրեն համապատասխան հագուստ։

Հեղինակ՝ Իզաբել Սահակյան

Աղբյուր` Փաստինֆո