Փաստ ինֆո

ԱԺ պատգամավոր Արման Բաբաջանյանի ֆինանսական աղբյուրները ստուգելու վերաբերյալ Հանրային խորհրդի նախկին նախագահ Վազգեն Մանուկյանի կնոջ՝ Վարդուհի Իշխանյանի հրապարակումը մնացել է անհետեւանք. ոստիկանությունը չի կարողացել ստուգմամբ նոր տվյալներ ձեռք բերել։

Հիշեցնենք, որ Վարդուհի Իշխանյանը հրապարակավ դիմել էր դատախազությանը՝ առաջարկելով ստուգելու Արման Բաբաջանյանի ֆինանսական աղբյուրները։

«Դիմում եմ դատախազությանը, թող պարզի Բաբաջանյանի ֆինանսական աղբյուրները,որտեղից են շքեղ տունը, հարուստ ԶԼՄ-ն։ Դիմում եմ ԱԱԾ-ին, որ պարզի Բաբաջանյանի կապը օտարերկրյա ծառայությունների հետ։Եվ ուզում նաև պարզել, թե ինչպես եղավ , որ Բաբաջանյանը ու Հունանյանը 1998-ին աշխատել են միասին Կարեն Դեմիրճյանի շտաբում»,- ֆեյսբուքում նշել էր նա։

Դատախազությունը նախ հայտարարել էր, որ տիկին Իշխանյանի հրապարակային կոչը որևէ տվյալ չի պարունակում հնարավոր հանցավոր դրսևորումների, գույքի կամ ֆինանսական միջոցների ապօրինի ձեռքբերման մասին, ուստի այն թողել են անհետեւանք։ Բայց հայտարարությամբ հանդես եկավ նաեւ Արման Բաբաջանյանը՝ նշելով, որ դիմել է գլխավոր դատախազին, որպեսզի այն քննարկման առարկա դառնա, ինչից հետո դատախազությունը տեղեկացրեց, որ Վարդուհի Իշխանյանի 29.10.2019թ. իր ֆեյսբուքյան էջում արված գրառման վերաբերյալ որոշ ԶԼՄ-ներում արված հրապարակումները, ինչպես նաև այդ գրառման կապակցությամբ ՀՀ ԱԺ պատգամավոր Արման Բաբաջանյանի կողմից ՀՀ գլխավոր դատախազին ուղղված դիմումն ուղարկվել է ոստիկանություն։

«Փաստինֆո»-ն դիմեց ոստիկանություն՝ պարզելու, թե արդյոք քրեական գործ հարուցվել է տիկին Իշխանյանի կողմից բարձրացված հարցադրումների կապակցությամբ, սակայն պարզվեց, որ քրդական դատավարության օրենսգրքով սահմանված կարգով նյութեր չեն նախապատրաստվել, կատարել են ուսումնասիրություններ ու թողել անհետեւանք այդ մասին տեղյակ պահելով դատախազությանը։

«Սոցցանցում կատարված գրառման, դրա վերաբերյալ ներկայացված հաղորդման մեջ նշված ընդհանրական և վերացական բնույթի տեղեկություններն ստուգելու դատախազության հանձնարարության կատարման շրջանակներում նշված անձինք հրավիրվել են ոստիկանություն՝ դրանց վերաբերյալ իրենց ունեցած կոնկրետ տվյալները, տեղեկությունները տրամադրելու նպատակով, ինչից, սակայն նրանք հրաժարվել են և հնարավոր չի եղել ստուգմամբ ավելի կոնկրետ տվյալներ ձեռք բերել: Այդ հանգամանքոով պայմանավորված՝ դրանց քրեադատավարական կարգով անդրադառնալու հիմքերը բացակայել են»,- «Փաստինֆո»-ին հայտնեց Դատախազության տեղեկատվության և հասարակայնության հետ կապերի բաժնի պետ Արևիկ Խաչատրյանը։

Հեղինակ՝ Իզաբել Սահակյան

Աղբյուր` Փաստինֆո