Փաստ ինֆո

2019թ. դեկտեմբերի 2-ին՝ ժամը 06:50-ի սահմաններում, ՊԲ N զորամասի պահպանության տեղամասի մարտական դիրքում պարտադիր ժամկետային զինծառայող Արթուր Իշխանի Աջամյանի մահացու հրազենային վիրավորում ստանալու, իսկ պարտադիր ժամկետային զինծառայող Դավիթ Հարությունի Մելիքբեկյանի հրազենային վիրավորումներ ստանալու դեպքի առթիվ հարուցված քրեական գործի շրջանակներում նշանակվել է դատաձգաբանական փորձաքննություն։ Այս մասին «Փաստինֆո»֊ին հայտնեց ՔԿ դեպարտամենտի տեղեկատվության և հասարակայնության հետ կապերի բաժնի պետի պաշտոնակատար Նաիրա Հարությունյանը։ 

«Քրեական գործով կատարվել են մի շարք անհետաձգելի և անհրաժեշտ քննչական գործողություններ՝ կատարվել է դեպքի վայրի զննություն, դիակի արտաքին զննում, նշանակվել է դիակի, ինչպես նաև Դ.Մելիքբեկյանի վերաբերյալ դատաբժշկական փորձաքննություններ, մի շարք զինծառայողներ հարցաքննվել են որպես վկա, տուժող Ա.Աջամյանի պապը՝ Խատիֆ Աջամյանը, ճանաչվել է տուժողի իրավահաջորդ և հարցաքննվել, փաստաբան Հայարփի Սարգսյանը և Խաչատուր Ստեփանյանը ճանաչվել են տուժողի իրավահաջորդի ներկայացուցիչներ և մասնակցել են դիակի դատաբժշկական փորձաքննությանը, վերցվել են մարտական դիրքի տեսախցիկների տեսագրությունները, միջնորդություններ են հարուցվել դատարան Ա.Աջամյանի հեռախոսային միացումների վերծանման և նրա բջջային հեռախոսը զննելու վերաբերյալ, նշանակվել է դատաձգաբանական փորձաքննություն: Քրեական գործով նախաքննությունը շարունակվում է»,֊նշեց Նաիրա Հարությունյանը:

Ավելի վաղ հայտնել ենք, որ 2019թ. դեկտեմբերի 2-ին՝ ժամը 06:50-ի սահմաններում, ՊԲ N զորամասի պահպանության տեղամասի մարտական դիրքում պարտադիր ժամկետային զինծառայող Արթուր Իշխանի Աջամյանի մահացու հրազենային վիրավորում ստանալու, իսկ պարտադիր ժամկետային զինծառայող Դավիթ Հարությունի Մելիքբեկյանի հրազենային վիրավորումներ ստանալու դեպքի առթիվ երրորդ կայազորային քննչական բաժնում ՀՀ քրեական օրենսգրքի 34-104-րդ հոդվածի 2-րդ մասի 1-ին կետով /երկու կամ ավելի անձանց սպանության փորձ/ հարուցվել է քրեական գործ, կատարվում է նախաքննություն: Քրեական գործով մեղադրյալներ չկան։

Ավելի վաղ «Փաստինֆո»-ն տեղեկացրել է, որ սպանված զինծառայողի հարազատներն այսօր բողոքի ակցիա են իրականացնում ԱԺ-ի մոտ՝ պահանջելով իրենց երեխային չկպցնել ինքնասպանության վարկածը։ «Ես ուզում եմ պատճառը իմանամ ինչի՞ համար է իմ էրեխեն սպանվել։ Ամսի 1-ին իմ էրեխեն ինձ հետ խոսացել ա, ասել ա՝ մամա ջան ես դիրքերում եմ եղել։ Ես արդարություն եմ պահանջում, իմ էրեխուն սպանողն ո՞վ ա եղել, բռնեք բերեք տվեք ինձ, պատճառը ի՞նչ ա եղել, որ անմեղ էրեխուն տանեք հայրենիքի համար ծառայի, դիակը բերեք տաք ինձ»,- հայտարարել է սպանված զինվորի մայրը։

Հեղինակ՝ Իզաբել Սահակյան

Աղբյուր` Փաստինֆո