Փաստ ինֆո

Որևէ խնդիր, որևէ հարց բարձրաձայնելուց առաջ պարոն Ծառուկյանն ունի դրանց բոլոր հիմնավորումներն ու անհրաժեշտ փաստարկները։ Լրագրողների հետ զրույցում այս մասին ասաց ԱԺ «Բարգավաճ Հայաստան» խմբակցության ղեկավար Իվետա Տոնոյանը՝ անդրադառնալով Երևանի քաղաքապետ Հայկ Մարությանի՝ երեկ հարցազրույցի ժամանակ արված հայտարարություններին։

«Պարոն Ծառուկյանը որևէ կերպ իր ճեպազրույցում չէր անդրադարձել որևէ շինարարության, որն իրականացվում է «Մուլտի գրուպ» կոնցեռնի կողմից։ Փոխանակ հասցեական կամ բովանդակային որևէ հարց քննարկեր, քաղաքապետը նախապատվությունը տալիս է ինչ-որ տարատեսակ թեմաների արծարծման և որդեգրում է կարևոր թեմաներից հանրության ուշադրությունը շեղելու քաղաքականություն»,-նշեց Իվետա Տոնոյանը։

Ինչ վերաբերում է Աբովյան փողոցում տեղի ունեցող շինարարությանը, պատգամավորը նշեց, որ 2019 թվականի ապրիլի 18-ին քաղաքապետ Հայկ Մարությանն անձամբ իր ձեռքով ստորագրել է այդ շինության նախագծման թույլտվությունը. «Նախագծման թույլտվությունը դա 99 տոկոսանոց շինթույլտվության համար անհրաժեշտ փաստաթուղթն է»,-նշեց Իվետա Տոնոյանը։

Դիտարկմանը՝ ստացվում է, որ շինթույլտվությունն էլ է Հայկ Մարությանը տվել, Իվետա Տոնոյանն ասաց. «Այդ տեխնիկական մանրամասներին կարող եք ծանոթանալ «Մուլտի գրուպ» կոնցեռնի կողմից։ Քաղաքապետն ասել է, որ ինքն ընդհանրապես տեղյակ չէ ու ծանոթ չէ այդ փաստաթղթին։ Ասում է, որ նախկին քաղաքապետի օրոք է ստորագրվել դա և ասում է, որ այդ փաստաթղթի հետ որևէ կապ ինքը չունի»,-հավելեց Իվետա Տոնոյանը։

Հարցին՝ եթե Հայկ Մարությանը տվել է նախագծման թույլտվություն, ինչի՞ արդյունքում է, որ այդ հարկերը բարձրացել են, եթե չկա շինթույտվություն, Իվետա Տոնոյանը հորդորեց բոլոր տեխնիկական մանրամասների համար դիմել «Մուլտի գրուպ» կոնցեռնին, որը պատասխանատու է շինարարության իրականացման համար. «Որը տևական ժամանակ է արդեն դատարանի որոշմամբ դադարեցված է, գիտեք հարևան կառուցապատողի հետ առաջացած խնդիրների պատճառներով»,-նշեց Իվետա Տոնոյանը։

Հարցին՝ համապատասխանում է իրականությանը Հայկ Մարությանի այն հայտարարությանը, որ առաջին երկու հարկերը կառուցվել են առանց շինարարական թույլտվության և եթե դա ճիշտ է, ապա ով է դրա պատասխանատուն, Իվետա Տոնոյանն արձագանքեց. «Ես կրկնում եմ, որ պարոն Հայկ Մարությանի կողմից տրամադրված այս նախագծման թույլտվությունը, որը ենթադրում է նաև շինթույլտվություն, նախնական փուլում տրվել է 11 հարկանի հյուրանոցային համալիր կառուցելու մասով, մնացած մասերով պետք է խնդրեմ, որ կա՛մ դիմեք «Մուլտի գրուպ»-ին կա՛մ համապատասխան ճարտարապետներին, որոնք այդ աշխատանքով զբաղված են։ Ես բացառում եմ, որ կարող է ապօրինի որևէ գործընթաց տեղի ունենալ»,-հավելեց Իվետա Տոնոյանը։

Աղբյուր` Փաստինֆո