Փաստ ինֆո

Որոշ մարդիկ այսօր թավիշը շփոթում են թուլության և փափկության հետ,- այսօր լրագրողների հետ զրույցում ասել է ԱԺ փոխնախագահ Ալեն Սիմոնյանը։

«Թող չխաբնվեն մեր երիտասարդ տարիքի, մեր բարի, սիրո և համերաշխության մթնոլորտի հետ։ Յուրաքանչյուր անձնավորություն, որն օրենքի հետ կապված խնդիր կառաջացնի, ստանալու, պետք է ստանա։ Ես ոստիկանապետից և ոստիկանությունից պահանջում եմ, որ հետամուտ լինեն օրենքի տառի իրականացմանը։ Ինչ-որ մարդկանց մոտ արդեն շատ է այն տպավորությունը, որ ամենաթողություն կարող է լինել»,-նշեց Ալեն Սիմոնյանը՝ անդրադառնալով երեկ ԿԳՄՍ նախարարության դիմաց բողոքի ակցիա իրականացնող ՀՅԴ երիտասարդներին։

Նա ընդգծեց, որ իշխանության ինչ-որ նախկին ներկայացուցիչներ երիտասարդների ֆոնին փորձում են քաղաքական դիվիդենտներ հավաքել՝ իշխանությանն ինչ-որ բանի մեջ մեղադրելով. «Ես չեմ խոսում իմ գործընկերներ Արման Աբովյանի և Անի Սամսոնյանի մասին, որոնք գնացին և ստուգեցին՝ արդյոք այնտեղ ամեն ինչ նորմալ է։ Ես նրանց որևէ ձևով չեմ մեղադրում։ Նման իրավիճակում ամենայն հավանականությամբ ես նույնը կանեի»,-ասաց ԱԺ փոխնախագահը։

Դիտարկմանը ինչու ինքը նունը չարեց, Ալեն Սիմոնյանն ասաց, որ ի տարբերություն ընդդիմադիր պատգամավորների ինքը վստահ էր՝ օրինականության հետ որևէ խնդիր չկա և չի կարող լինել ոստիկանությունում. «Վստահ էի, որ 3 ժամը լրանալուն պես մեր երիտասարդները դուրս էին գալու և հնարավորություն էին ունենալու արտահայտվել կամ շարունակել։ Եթե Աստված մի արասցե ինչ-որ խնդիր լիներ ես անձամբ այն ոստիկանին, այն պետական պաշտոնյային, որն իրեն թույլ կտար անհամաչափ ինչ-որ քայլ անել, ուժ կիրառել կամ սխալ պահեր, կհետևեի, որ պատժվեր»,-հավելեց Ալեն Սիմոնյանը։

Նա ընդգծեց, որ Դաշնակցությունը քաղաքական նպատակներ է հետապնդում, ուզում է վերակենդանանալ, բայց Ալեն Սիմոնյանի պնդմամբ այս քայլով ինքը վատնելու է իր ունեցած վստահությունը. «Տենց շինծու օրակարգերով և նման գործելաոճով նրանք որևիցե բանի չեն հասնելու»,-հավելեց Ալեն Սիմոնյանը։

«Փաստինֆո»-ի թղթակցի դիտարկմանը, որ ՀՅԴ երիտասարդները նշում են՝ եթե Արայիկ Հարությունյանը գործուղումների գնա, այնտեղ էլ են նրան հետապնդելու, արդյոք այստեղ Հայաստանի վարկանիշն իջնելու խնդիր չկա՞, Ալեն Սիմոնյանն ասաց. «Ինչ է նշանակում հետապնդել ԿԳՄՍ նախարարին։

Բոլորն ազատ են՝ ակցիա անելու համար։ Չեմ բացառում, որ մի օր էլ ես ակցիա անեմ ԱԺ դահլիճում նախկին քաղաքական մի գործչի հետ կապված կամ հենց իր գրասենյակի դիմաց։ Ակցիաներ ազատ են բոլորն իրականացնել, բայց որևիցե քաղաքական գործչի հետապնդելու գաղափարն արդեն իսկ լավ չի հնչում»,-հավելեց ԱԺ փոխնախագահը։

Նա նաև հավելեց, որ երեկ ԿԳՄՍ նախարարի հետ հանդիպելու նպատակ չի եղել. «Նպատակ է եղել մտնել կառավարական շենք և այնտեղ ակցիա անցկացնել, բայց դա քողարկվել է իբր հանդիպման բանով։ Կարող եմ ասել, որ քաղաքը շատ փոքր է և ներսի նրանց խոսակցությունը, կազմակերպչական բաները, դաշնակցական բարձրաստիճան պաշտոնյաների հեռախոսով որ կանգնում են նախարարության շենքի մոտ ասում են՝ դե ասեք թող շուտ մարդ գա, մեր մոտ քիչ ա մարդը, սաղ ծրագիրը պրավալա գնում։ Էդ բաները, որ անում են, պետք է ուշադիր լինեն, որ ՀՀ-ում սաղ տեսախցիկա ու մարդիկ լսում են»,-հավելեց Ալեն Սիմոնյանը։

Աղբյուր` Փաստինֆո