Փաստ ինֆո

Մեր ասելիքն ավելի ըմբռնելի է դառնում մեր գործընկերների համար։ Դրա մասին են վկայում այդ թեմայով վերջին շրջանում հրապարակային հնչած հայտարարությունները,- Ազգային ժողովում ասաց ՀՀ վարչապետ Նիկոլ Փաշինյանը՝ պատասխանելով հարցին՝ որքանով հույսեր կան, որ Ռուսաստանի և ՀԱՊԿ անդամ երկրների կողմից Ադրբեջանին զենք վաճառելու հարցում փոփոխություններ կլինեն։

Վարչապետն ընդգծեց, որ բոլոր հարթակներում պետք է հետևողականորեն պաշտպանել ազգային շահերը, ազգային հետաքրքրությունները։
«Եթե ուշադրություն եք դարձրել Բիշքեկում ես հարցն առաջադրեցի բոլորովին ուրիշ կոնտեքստում՝ ասելով, որ վստահ եմ՝ ՀԱՊԿ-ն ունի բոլոր լծակները մեր տարածաշրջանում, մասնավորապես՝ Լեռնային Ղարաբաղի հակամարտության գոտում, նոր էսկալացիա թույլ չտալու համար։ Ես ցույց տվեցի, որ տվյալ դեպքում խոսքը ոչ միայն Հայաստանի անվտանգության մասին է, այլև ՀԱՊԿ պայմանագրի երկրների և մեծ հաշվով տարածաշրջանի համար»,-նշեց վարչապետը։

Նրա համոզմամբ, եթե ԼՂ հակամարտության գոտում ունենանք նոր ռազմական էսկալացիա, դա հետաքրքիր միջավայր կդառնա Սիրիայում իրենց հենարանը կորցնող իսլամական ահաբեկիչների համար, որոնց համար այդ վիճակում գտնվող Ադրբեջանը շատ լավ հենարան կարող է դառնալ. «Ուզում եմ տեղեկացնել, որ տեղեկություն ունենք, որ իսլամական պետության կազմում են բազմաթիվ Ադրբեջանի քաղաքացիներ և եթե սխալ քաղաքականության արդյունքում նրանց հաջողվի Ադրբեջանում որոշակի հենակետ ունենալ, Ադրբեջանն աշխարհագրորեն նրանց համար հարմար է գործելու դեպի արևելք և հյուսիս, հարավ և արևմուտք, որտեղ նրանք իրենց պատկերացմամբ կարող են ունենալ նպաստավոր միջավայր, իսկ այդ ուղղություններից առնվազն երկուսում ՀԱՊԿ երկրներ են և ես ասացի, որ ոչ միայն Հայաստանի, այլև սեփական անվտանգտության նկատտառումներից ելնելով այս հարցը պետք է մեր գործընկերները լրջորեն դիտարկեն»,-հավելեց վարչապետը։

Հեղինակ՝ Հասմիկ Կոշկարյան

Աղբյուր` Փաստինֆո