Փաստ ինֆո

«Հայաստան» համահայկական հիմնադրամի հեռուստամարաթոնի էությունը մինչև հիմա եղել է հետևյալը, որ վարչահրամայական մեթոդներով գումարներ են հավաքել, գնացել են օլիգարխներից խնդրել են, մուրացել են, որտեղ տեղն է եղել՝ սպառնացել են։ Ազգային ժողովում այս մասին հայտարարեց ՀՀ վարչապետ Նիկոլ Փաշինյանը։

«Նույն մարդկանցից 30 տարի անընդհատ փող են հավաքել, ծայրահեղ դեպքում ասել են՝ խոստացի ուղղակի։ Մենք էսօր ուզում ենք համակարգ փոխենք, որ «Հայաստան» համահայկական հիմնադրամը դառնա իրոք «Հայաստան» համահայկական հիմնադրամ։ Իր գոյության ողջ ընթացքում հիմնադրամը հավաքել է 350 մլն դոլար, սա կներեք ազգային խայտառակություն է, որովհետև հիմնադրամը չի եղել հիմնադրամ, այլ եղել է նեղ շրջանակի հիմնադրամ։ Այդ նեղ շրջանակում եղել են նվիրյալ մարդիկ, որոնք անընդհատ, առանց հոգնելու ամեն տարի տվել են, բայց լավ ամոթ է ամեն տարի կարելի է գնալ խնդրելով, աղաչելով անընդհատ գումար վերցնել։ Այս տարի զրոյական կետ է, որովհետև մենք ուզում ենք, որ «Հայաստան» համահայկական հիմնադրամը լինի «Հայաստան» համահայկական հիմնադրամ, ոչ թե դրամահավաքի 90 տոկոսը տան 3 կամ 4 կամ 10 հոգի, այլ միլիոնավոր հայեր մասնակցեն այդ դրամահավաքին»,-հավելեց վարչապետը։

Նա հիշեցրեց, որ հիմնադրամի տնօրենն անցնում է չարաշահումների քրեական գործով և դա ծանր ընտրություն է, քանի որ ոչ մի նվիրատուի համար հաճելի չէ, երբ տեղեկանում են, որ իրենց տված գումարներից գողացել են կամ գնացել են բուքմեյքերական գրասենյակներում խաղադրույքներ են արել. «Եթե հիմնադրամի դրամահավաքն ուզում են համեմատել նախորդ տարիների հետ, թող չհամեմատեն, որովհետև մենք զրոյից ուզում ենք ստեղծել «Հայաստան» համահայկական հիմնադրամ և մենք կստեղծենք»,-ասաց վարչապետը։

Աղբյուր` Փաստինֆո