Փաստ ինֆո

Մինչ հանրապետության վարչապետը տարբեր երկրներում տնտեսական համաժողովների և օտար երկրներ կատարած իր պաշտոնական այցերի ընթացքում հայ և օտարազգի  ներդրողներին Հայաստան է հրավիրում՝ թե՝ եկեք, ներդրումներ իրականացրեք մեր երկրում, Երևանի քաղաքապետը, պարզվում է, ռեալ ներդրումների պատրաստ ԱՄԷ շեյխերին,  որ մի շարք ոլորտներում՝ հյուրանոցային բիզնեսի, առողջապահության և այլ ոլորտներում պատրաստակամություն են հայտնել ներդրումային ծրագիր իրականացնել, մեղմ ասած՝ դուռն է ցույց տվել:

Հետաքրքիր է, ինչո՞վ է բացատրում քաղաքային իշխանության ղեկավարը սույն փաստը և արդյո՞ք այս դեպքում  քաղաքական ենթատեքստ չի ունեցել նրա վերաբերմունքն արաբ մեծահարուստների նկատմամբ:  Ըստ էության,  վերջիններս ԲՀԿ առաջնորդ Գագիկ Ծառուկյանի գործընկերներն են:

ԲՀԿ ղեկավար Գագիկ Ծառուկյանի խոսքով՝  ներդրողները պատրաստ են եղել վթարային շենքերը վերականգնելու արդյունքում բարեգործական ծրագիր իրականացնել՝ հիվանդանոցային համալիր կառուցել, որից հնարավորություն կունենան օգտվել ու  բուժվել ՀՀ քաղաքացիները:

Մի տեսակ, ստացվում է, որ աջ ձեռքը չգիտի, թե ձախն ինչ է անում: Վարչապետը խրախուսում է ներդրումները, իսկ քաղաքապետը կարծես վարչապետի դե՞մ է գործում:

Ի դեպ, էնպես չի, որ   ներկա իշխանության ներկայացուցիչները դեմ են ԱՄԷ-ից կատարվող ներդրումներին, ուղղակի այս դեպքում են դեմ եղել, թե չէ, օրինակ,   ՀՀ փոխվարչապետ Ավինյանը, նրա խորհրդական, քաղաքաշինության կոմիտեի նախկին նախագահ Ավ. Էլոյանը ամիսներ առաջ ԱՄԷ-ից Երևանում  կատարվելիք խոշոր մի ներդրումային ծրագրի մասին հայտարարեցին՝ այս համատեքստում էլ ասուլիս հրավիրեցին  և  Երևանում, Դալմայի այգիների մատույցներում   անակնկալ որպես 71 հարկանի երկնաքեր կառուցելու  մասին ազդարարեցին:

Վերջինիս տեղն ու հարկայնությունն, իհարկե, միանգամից հակառակ ռեակցիա առաջացրեց հանրության շրջանում, ավելին, այն լուրջ  քննարկման առարկա դարձավ մասնագիտական շրջանակներում, մամուլում ու սոցցանցերում, բախվեցին շահեր ու շահագրգռություններ, որոնք առայսօր շարունակվում են:

Նկատենք, որ այս մտահոգիչ ծրագրի հետ կապված քաղաքային իշխանության հստակ պարզաբանումը ոչ միայն հստակ չէր,  այլև այնտեղից ասացին՝ մենք ոչինչ չգիտենք, մեզ ոչինչ չի ներկայացվել: Այսինքն, արաբները և Էլոյանը անջուր բոբիկացե՞լ էին: Մի տեսակ՝ շարունակ  տպավորություն կա, թե ոչ միայն ընդդիմադիր, այլև՝ ՀՀ  ,,հպարտ,, քաղաքացիներից քաղաքապետարանն ու կառավարությունը միշտ ինչ-որ բան թաքցնում են:

Փաստորեն, ներդրում-ներդրում են ասում ներկա իշխանությունները, բայց քաղաքային իշխանությունը  ներդրողին վանում է: Ո՞րն է իրական պատճառը: Քաղաքական շահե՞րը, թե՞ քաղաքաշինության շահերը, իսկ միգուցե՝ նախկինում ,,Երևան,, հիմնադրամին, այսօր էլ՝ նախկին  ժամանակների տրամաբանությամբ՝  պարտադիր- կամավոր՝,, ես քեզ, դու ինձ,, սկզբունքը եթե չի գործում, ուրեմն, ներդրում անելու կարիք չկա՞: ՀՀ քաղաքացիների հերն էլ անիծած:

Մեկ բան հստակ է՝ այս իշխանությունը ներդրողների հետ ի շահ երկրի և մեր  քաղաքացիների աշխատելու կարողականություն չունի: Կամ՝ ցանկություն չունի: Մինչդեռ պետք է նրանց ոչ միայն լսել, այլև՝  ուղղորդել, հնարավորինս աջակցել, ներկայացնել մեր անհրաժեշտությունները:  Այնպես, որ մեր ու  իրենց շահերը հատվեն: Մի խոսքով, ներդրողի հետ աշխատել է պետք:

Հեղինակ՝ Մարինե Մինասյան

Աղբյուր` Փաստինֆո