Փաստ ինֆո

«Ես կարծում եմ, որ ճիշտ է արել, եթե մարդիկ կան, որ թույլ են տալիս, որ իրենց հետ էդպես վարվեն , եթե իրենց համար Հայաստանի պետականությունն էդ ա, որ ջինսով բոթասով պիտի մտնեն, ասեն՝ դու ստեղից ընդեղ... էդ ժամանակները պրծել են։ Եթե ՀՀ-ում այդպիսի քաղաքապետեր, գյուղապետեր են եղել, նախարարներ, որոնց հետ էդպիսի հարաբերություններ են եղել, իրենց ժամանակն ավարտվել է», -ԱԺ ամբիոնից հայտարարեց ՀՀ վարչապետ Նիկոլ Փաշինյանը ՝ անդրադառնալով Երեւանի քաղաքապետի եւ արաբական ներդրողների հետ կապված սկանդալին եւ ներդրումային միջավայրից ԲՀԿ-ի դժգոհություններին։

«Թույլ տվեք այդքան էլ վստահ չլինել, որ նշված անձինք շեյխերի ներկայացուցիչ են եղել, եթե նրանք ԱՄԷ ներկայացուցիչ լինեին, նրանք կարիք չունեին ունենա Գագիկ Ծառուկյանին խնդրել, որպեսզի Գագիկ Ծառուկյանը զանգի ինձ եւ խնդրի, որ ես քաղաքապետին միջնորդեմ, որ նրանց ընդունի»,-շարունակեց ՀՀ վարչապետը։ Նա ասաց, որ հակառակ պարագայում նրանք դեսպանատան միջոցով կարող էին դիմել։

Նիկոլ Փաշինյանը վերապատմեց նախօրեին Հանրային հեռուստաընկերության եթերից Երեւանի քաղաքապետ Հայկ Մարությանի ներկայացրածը այն մասին, որ ներդրողները Ծառուկյանի միջոցով զանգել են վարչապետին, հանդիպում խնդրել, ապա ներկայացել, ինչպես վարչապետն ասաց, ջինսերով ու բոթասներով, մինչդեռ արարողակարգի համաձայն հանդիպում է կազմակերպվել։ Ապա վերապատմեց, որ քննարկման ընթացքում նրանք Երեւանի կենտրոնում հողատարածք են ցանկացել ստանալ, նշեց, որ Մարությանն առաջարկել է գնել, պատմեց, որ նրանք սկսել են հեռախոսով խոսել եւ, որ հանդիպումն ավարտվել է այդքանով։

Անդրադառնալով ներդրումային միջավայրից ԲՀԿ-ի դժգոհություններին, Նիկոլ Փաշինյանը հայտարարեց. «Երբ ԲՀԿ-ն սկսել է ներդրումային միջավայրից բողոքել, ժամանակագրորեն դա համընկել է այն բանի հետ, որ ՔԿ-ում մեղադրանք է առաջադրվել «Մուլտի գրուպ»-ի ղեկավարի դեմ՝ Հյուսի-Հարավի ծրագրի շրջանակում շատ խոշոր չարաշահում թույլ տալու համար։ Ես ուզում եմ ասել, որ Հյուսիս-Հարավ պրոյեկտը ներդրումային շատ լավ միջավայր է եղել, որ բռնել՝ որպես կթու կով կթել են, ով հասել է, հիմա մենք թաթիկները կտրում ենք՝ հատ- հատ եւ շարունակելու ենք կտրել, եւ որեւէ մեկը չմտածի, որ ՀՀ դրոշին, պետականությանն, ինքնիշխանությանն, պետական արժանապատվությանը կարա իր կեղտոտ թաթիկներով կպնի, կկտրենք բոլորի թաթիկները»։

Աղբյուր` Փաստինֆո