Փաստ ինֆո

Չկա որևէ հիմք, որ Կոստանյանի նկատմամբ խափանման միջոց ընտրեն կալանքը և մեր կարծիքով նրան առաջադրված մեղադրանքը ևս անհիմն է։ Կան ՀՔԾ-ի ենթադրություններ, որոնք իրավական հիմքեր չունեն։ Դատական նիստից հետո հայտարարել է ՀՀ նախկին գլխավոր դատախազ Գեւորգ Կոստանյանի փաստաբան Համբարձում Մելիք-Սարգսյանը՝ պատասխանելով լրագրողների հարցերին։

Ավելի վաղ «Փաստինֆո»-ն տեղեկացրել է, որ դատարանն այսօր բավարարել է Գևորգ Կոստանյանի նկատմամբ որպես խափանման միջոց կալանավորումն ընտրելու մասին քննիչի միջնորդությունը։

Փաստաբանը տեղեկացրեց, որ պատրաստվում են բողոքարկել և՛ հետախուզման, և՛ որպես խափանման միջոց կալանք ընտրելու որոշումները։ Հարցին՝ եթե բողոքարկեն, բայց խափանման միջոցը չփոխվի, Գևորգ Կոստանյանը Հայաստան չի՞ գալու, փաստաբանն ասաց. «Հուսով եմ, որ այս որոշումը փոխվելու է, որովհետև այն որևէ իրավական հիմք չունի»։ Մեկ այլ հարցի՝ արդյոք հնարավոր է՝ Գևորգ Կոստանյանը ցանկություն ունի ՌԴ քաղաքացիություն ստանալու, Համբարձում Մելիք-Սարգսյանն ասաց. «Նման տեղեկություն չունեմ և համոզված եմ, որ նման բան չի կարող լինել։ Նրան ճանաչելով համոզված եմ, որ նման բան չի կարող լինել։ Նա քաղաքացիությունը չի փոխի»,-նշեց փաստաբանը։

Նա նկատեց, որ Գևորգ Կոստանյանին հարցաքննել են 1 տարի առաջ, որից հետո նրա հետ որևէ քննչական, դատավարական գործողություն չի կատարվել. «Այս ամենն սկսվել է կատարվել այն ժամանակ, երբ Կոստանյանը գնացել է աշխատանքի ընդունվելու՝ ՌԴ-ում դասավանդելու։ Ոչ մեկս ենթատեքստերի հետ կապված ենթադրություններ չենք կարող անել, բայց այդ մեկ տարվա ընթացքում, եթե գործողություններ կային անելու, պետք է արվեին»,-հավելեց փաստաբանը։

Լրագրողի հարցին, որ Գևորգ Կոստանյանը և Գևորգ Մհերյանը 25 հարցից բաղկացած հարցաշար են տարել ոստիկանություն և հորդորել ոստիկանության բարձրաստիճան պաշտոնյաներին կազմել հետին թվով փաստաթղթեր, ինչը Կոստանյանը չէր հերքել, փաստաբանն արձագանքեց.

«Մենք պետք է կարողանանք տարբերակել հարցաշարը կեղծ փաստաթղթեր կազմելուց։ Հարցաշարը վերաբերում է կոնկրետ ոստիկանության առնչության տվյալ դեպքին, Մարտի 1-ին, Մարտի 2-ին դրանից առաջ ինչ օպերատիվ միջոցառումներ են կատարել, ինչ հիմքեր է ունեցել դրանք կատարելու համար, իսկ կեղծ փաստաթղթերն ընդունվել են ըստ նախաքննական մարմնի կազմվել են կոծկելու համար կատարված իրողությունը»,-նշեց փաստաբանը՝ ընդգծելով, որ չգիտի՝ ոստիկանությունն այդ կեղծիքները կատարել են, թե ոչ, բայց Գևորգ Կոստանյանի առնչությունը դեպքին որևէ աղերս չունի. «Քննիչը դա պետք է ապացուցի։ Նրա դատարան ներկայացրած փաստաթղթերում այդ մասին որևէ հիմնավորում չկար։ Այնտեղ կային բազմաթիվ անուններ, բայց դրանք չեն նշանակում, որ Գևորգ Կոստանյանն այդ մարդկանց հետ համագործակցությամբ այդ արարքն արել է»,-հավելեց փաստաբանը։

Հեղինակ՝ Հասմիկ Կոշկարյան

Աղբյուր` Փաստինֆո