Փաստ ինֆո

ՀՔաղաքապետ Հայկ Մարությանը Գագիկ Ծառուկյանին շինթույլտվություն չի տվել։ Այս մասին լրագրողների հետ զրույցում ասաց Հայկ Մարությանի մամուլի խոսնակ Հակոբ Կարապետյանը։

Անդրադառնալով քաղաքապետի հայտարարությանն առ այն, որ ԱԺ ԲՀԿ խմբակցության ղեկավար Գագիկ Ծառուկյանին պատկանող «Մուլտի Գրուպ» ընկերությունն ապօրինի շինարարություն է իրականացնում Աբովյան 5 հասցեում, որին հաջորդել էր Գագիկ Ծառուկյանի պատասխանը, ըստ որի Մարությանն անձամբ է ստորագրել թույլտվությունը, Կարապետյանը նշեց, որ խոսքը երկու փաստաթղթերի մասին է։ «Նախագծման թույլտվությունը և շինարարական թույլտվությունը։ Նախագծի թույլտվությունը ստանալուց հետո կառուցապատողը կրկին դիմում է համայնքին՝ շինթույլտվություն ստանալու համար, որից հետո միայն կարող է սկսել շինարարական աշխատանքները»,- ասաց Կարապետյանը։ Ինչ վերաբերում է Ծառուկյանի հայտարարությանը, որ շինթույլտվություն տվել է Նարեկ Սարգսյանը, Կարապետյանը նշեց. «Շինթույլտվություն տալիս է միայն համայնքի ղեկավարը։ Մենք Նարեկ Սարգսյան անունով քաղաքապետ չենք ունեցել։

Մենք ունեցել ենք Տարոն Մարգարյան քաղաքապետ, որը 2018թ. փետրվարի 16–ին տվել է շինթույլտվություն»։ Կարապետյանի խոսքով՝ դրանից երեք օր անց, Վարչական դատարանը վարույթ է ընդունել հարևան շինության սեփականատիրոջ բողոքը, և վարույթն ընդունելու պահից շինարարությունը կասեցվել է։ «Բայց մեր հարգարժան կառուցապատողները, ինչպես ցանկացած շուստրի տղա, փորձելով շրջանցել օրենքը՝ այդտեղ իրականացրել է կառուցապատում, և 2018թ. հունիս–հուլիս ամիսներին, երբ ընկալում կար, որ մի քիչ խառն է իրավիճակը, այդ շինարարությունն ինտենսիվորեն ընթանում էր»,- ասաց Կարատետյանը՝ հավելելով, որ դրանից հետո ընկերությունը մի քանի անգամ տուգանվել է համայնքի կողմից ՝ 200 հազար ՀՀ դրամով և 2մլն ՀՀ դրամով։ Կարապետյանը նշեց, որ երկրորդ տուգանքից հետո գործն ուղարկվել է իրավապահ մարմիններին։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո