Փաստ ինֆո

«Ես ուզում եմ պատճառը իմանամ ինչի՞ համար է իմ էրեխեն սպանվել։ Ամսի 1-ին իմ էրեխեն ինձ հետ խոսացել ա, ասել ա՝ մամա ջան ես դիրքերում եմ եղել։ Ես արդարություն եմ պահանջում, իմ էրեխուն սպանողն ո՞վ ա եղել, բռնեք բերեք տվեք ինձ, պատճառը ի՞նչ ա եղել, որ անմեղ էրեխուն տանեք հայրենիքի համար ծառայի, դիակը բերեք տաք ինձ»,-ԱԺ շենքի առջեւ հայտարարեց սպանված  զինծառայող Արթուր Աջամյանի մայրը։

Զինծառայողի հարազատները հավաքվել են ԱԺ շենքի առջեւ եւ պահանջում են պարզել դեպքի մանրամասները։ Նրանք հայտարարում են՝ եթե քննություն է ընթանում, ինչո՞ւ են ինքնասպանության վարկածն առաջ քաշում։

Հիշեցնենք, որ դեկտեմբերի 2-ին՝ ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում, դեռևս չպարզված հանգամանքներում, մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը, իսկ զինծառայող, 1999թ. ծնված Դավիթ Հարությունի Մելիքբեկյանը վիրավորվել է: Քննչական կոմիտեն դեպքի առթիվ քրեական գործ է հարուցել երկու եւ ավելի անձի նկատմամբ սպանության փորձի հատկանիշներով՝ ՀՀ քրեական օրենսգրքի 34-104-րդ հոդվածի 2-րդ մասի 1-ին կետով։

Մահացած զինծառայողի հարազատներին մոտեցավ Մարդու իրավունքների պաշտպանության եւ հանրային հարցերի մշտական հանձնաժողովի նախագահ Նաիրա Զոհրաբյանը՝ հավաստիացնելով, որ բոլոր մեղավորները ենթարկվելու են պատասխանատվության։ Նրանք պահանջեցին հանդիպում  ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանի հետ եւ Զոհրաբյանը դա փոխանցել Քոչարյանին, ինչից քիչ անց նա նա մոտեցավ ցուցարարներին։ «Ես կարող եմ Ձեզ մի բան խոստանալ՝ էն ինչ դուք ասում եք, որեւէ բան չկա, որ մենք հակադարձենք։ Մեր հանձնաժողովը, համարեք այս պահից ճշմարտության բացահայտման հարցում ձեր կողքին կանգնած է։ Ահավոր բան է, որ բանակում տեղի են ունենում նմանատիպ հանցագործություններ, ՝ սպանություն, ինքնասպանություն, դա երեկ չծնվեց, տարիների կուտակված երեւույթներն են»,-հայտարարեց Անդրանիկ Քոչարյանը

Մահացածի հորեղբայրը հայտարարեց, որ եթե ճշմարտությունը չբացահայտվի, զինվորի մարմինը կբերենք հենց այստեղ։

Աղբյուր` Փաստինֆո