Փաստ ինֆո

ԱԺ «Բարգավաճ Հայաստան» խմբակցությունն այսօր բոյկոտեց ԱԺ նիստն ու դուրս եկավ դահլիճից, որից հետո ԲՀԿ պատգամավոր Գևորգ Պետրոսյանն ասաց՝ բոյկոտեցին, որպեսզի որոշ մարդիկ ուշքի գան։

«Խորհրդարանը քաղաքական մարմին է, և երբ առանձին պատգամավորներ մոռանում են այդ մասին ու վերածում սեփական հարցերի լուծման, վիրավորանքների հարթակի, մենք այս ակցիան իրականացրինք, որ որոշ մարդիկ ուշքի գան և հիշեն, թե ինչ են աշխատում և որն է իրենց գործառույթը»,-այս մասին այսօր լրագրողների հետ ճեպազրույցում ասաց ԲՀԿ պատգամավոր Գևորգ Պետրոսյանը։

Նա նշեց, որ ԱԺ-ում պատգամավորներ կան, որոնց դեմքը ոչ ոք չի ճանաչել, բացի իրենց տնեիցներից. «Հիմա ասում են Ծառուկյանը այսպես, այնպես։ Ամոթ է, այս 2 օրերի օրակարգը վերածվել է Ծառուկյանի անձնական գործունեության քննադատության։ Այդ մարդը պետական բեռը վերցնի իր վրա, իր անձնական կապերն օգտագործելով 2 մլրդ-ի ներդրում ցանկանա անել, որ պոզ ու պոչ կպցնե՞ն։ Սա ի՞նչ թշնամանքի մթնոլորտ է»։

Պետրոսյանի խոսքով, «Իմ քայլի» որոշ պատգամավորներ միտումնավոր մթնոլորտը սրացման են տանում։
«Ծառուկյանն իր անձնական կապերով 2 մլրդ-ի հասնող ներդրում է ցանկանում ապահովել, իսկ իրենց մեծ մասը, որ նախընտրական խոստումներ էր տալիս, թե այս կանենք, այն կանենք, զրոյական վիճակում դոփում է գետնին։ Իրենց անտնտեսվար քաղաքականության պատճառով Հայաստանը կորցրեց 2 մլրդ ներդրում, դե հիմա թող գնան ժողովրդին պատասխան տան, թե ինչքանով են հավատարիմ նախընտրական խոստումներին»,-ասաց Պետրոսյանը։

Նա ընդգծեց, որ իրենց խմբակցությունն իսկապես աշխատելու համար է ԱԺ գալիս, սակայն թիվ մեկ քաղաքական ամբիոնը վերածվել է անձնական բամբասանքի հարթակի։

ԲՀԿ խմբակցության քարտուղար Արման Աբովյանն էլ խոսելով ներդրողների մասին, ասաց, որ այդ մարդիկ պատրաստ էին 2-3 անգամ ավելին վճարել հողատարածք գնելու և հիվանդանոց կառուցելու համար, որը պետք է անվճար լիներ։
«Ի՞նչ դժվար բան կա։ Եթե պարոն Ավինյանն ասում է, որ տարածքն անվճար են տալիս, ուրեմն չի տիրապետում եղելությանը, մի տեղ մի բան են ասում, մյուս տեղ մեկ ուրիշ բան։ Կողմնորոշվեք ինչ է կատարվում։ Մի նախադասություն է ասվել՝ ներդրողն եկել է և դժգոհ գնացել։ Վերլուծելու փոխարեն, թե ինչու է գնացել և ներդրումները չեն եղել, շեղում են, ինչ-որ թեմաներ են առաջ քաշում»,-ասաց Աբովյանը։
Մանրամասները՝ տեսանյութում։

Աղբյուր` Փաստինֆո