Փաստ ինֆո

Ամոթալի է, որ նախկինի հայտնի քաղաքական գործիչներն այսօր փորձում են պատսպարվել այդ երիտասարդների ետևում և այդ երիտասարդների ֆոնին երևալ տարբեր հեռուստաընկերությունների կադրերում։ Այս մասին լրագրողների հետ զրույցում ասաց ԱԺ փոխխոսնակ Ալեն Սիմոնյանը՝ անդրադառնալով ԿԳՄՍ նախարարության շենքի նախօրեին տեղի ունեցած բողոքի ակցիային։ 

«Դաշնակցության ներկայացուցիչները թող գան, նստեն այնտեղ, այլ ոչ թե երիտասարդներին մղեն և հետո գան իրենց ֆոնին երևան։ Եվ թող բարի լինեն մի հատ դաշնակցության դրոշ բացեն, որ մարդիկ իմանան վերջ ի վերջո այդ կուսակցությունը գործում է, թե չի գործում»,-նշեց Ալեն Սիմոնյանը։

«Փաստինֆո»-ի թղթակցի հարցին՝ ինչպես է գնահատում ոստիկանական ուժերի գործողությունը, Ալեն Սիմոնյանն արձագանքեց. «Շատ լավ եմ գնահատում, որևիցե մեկը չի տուժել։ Երիտասարդները մեկ անգամ հեռացվել են, դրանից հետ կրկին եկել են , զգուշացվել են և վերջիվերջո պետք է ֆիքսենք, որ մենք պետք է հարգանքով վերաբերվենք ՀՀ ոստիկաններին, որովհետև եթե ժամանակին մենք կարող էինք ինչ-որ հարցադրումներ ներկայացնել այդ կառույցի նկատմամբ, այսօր այդ հարցադրումը ներկայացնելու իրավունք չունենք, որովհետև ոստիկանությունը գործում է օրենքի շրջանակներում, ոստիկանության մեջ չկա համակարգային կոռուպցիա, որը պարտավորեցնում է ՀՀ յուրաքանչյուր քաղաքացու ոստիկանության անդամներին վերաբերվել առավելագույն հարգանքով։ Այդ մարդիկ կատարում են իրենց աշխատանքը և այսօր կատարում են շատ ավելի լավ, քան երբևէ»,-նշեց Ալեն Սիմոնյանը։

Դիտարկմանը, որ նույն գործողությունները ոստիկաններն անում էին նաև հեղափոխության օրերին և այդ ժամանակ վերջիններս դժգոհում էին ոստիկանների այդ գործողություններից ի՞նչն է պատճառը, որ այսօր չեն դժգոհում, Ալեն Սիմոնյանն ասաց. «Ոստիկանության գործողություններն այսօր եղել են շատ համաչափ, շատ տեղին, օրենքի տառին համապատասխան։ Ես նույնիսկ մեղադրում եմ ոստիկանությանն ավելի կտրուկ գործողություններ չանելու համար, որովհետև երբ երիտասարդներին խնդրում են, բացում են ճանապարհը։ Անցյալ ժամանակ մեզ հիմա ծեծելով և մեքենայի մեջ ոտքով հարվածելով, անձամբ ինձ հետ եղել է նման դեպք, հարվածելով կտանեին ոստիկանություն և այնտեղ նույնպես ոչ պատշաճ ձևով իրենց կպահեին»,-հավելեց ԱԺ փոխխոսնակը՝ ընդգծելով, որ այսօր նկատել է շատ ավելի ագրեսիվ պահվածք, որը նպատակաուղղված է հրահրել իշխանությանը և դա ըստ Ալեն Սիմոնյանի՝ արվում է քաղաքական առումով՝ իշխանությանը հրահրել որևէ գործողության, որպեսզի կարևորեն այն գործողությունը, որը երեկ ուզում էին անել. «Իրենց անցած էդ ճանապարհները մենք մթով ենք անցել։ Իրենց անցած իշխանության ժամանակ ենք անցել, երբ Դաշնակցությունը Հանրապետականի հետ կոալիցիա էր և Դաշնակցությունն ու Հանրապետականն ամեն ինչ անում էին, որ ակտիվիստներին, ընտրությունների ժամանակ վախեցնելով ոչնչացնեն ու հետ պահեն։ Էդ ճանապարհները մթով ենք անցել, թող մտքերով չանցնի, որ ասում են մենք 100-ամյա կուսակցություն ենք։ Իրենք ինչ կապ ունեն էդ անցածի հետ, նրանք այնքան են հեռացել այդ գաղափարախոսությունից, որ ասելու չէ»,-նշեց Ալեն Սիմոնյանը։

Աղբյուր` Փաստինֆո