Փաստ ինֆո

Արդարադատության հասնելու լավագույն գործիքը իրավական պետությունն է։ «Փաստինֆո»-ի հաղորդմամբ՝ այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին հայտարարել է Սեյրան Օհանյանի պաշտպան Կարեն Մեժլումյանը։

Ավելի վաղ հայտնել ենք, որ փաստաբան Կարեն Մեժլումյանը միջնորդություն է ներկայացրել՝ Ս.Օհանյանի նկատմամբ քրեական հետապնդումը դադարեցնելու և գործը կարճելու, ինչպես նաև խտրական մոտեցումը վերացնելու մասին։

Կարեն Մեժլումյանը գտնում է, որ ՀՀ քրեական օրենսգրքի 300.1-րդ հոդվածի հատկանիշներով հարուցված գործը ենթակա է կարճման, քանի որ հանցագործությունը սահմանող օրենքները հետադարձ ուժ չունեն, իսկ պատիժը մեղմացնող կամ հանցավորությունը վերացնող  օրենքներն ունեն հետադարձ ուժ։

Կրեն Մեժլումյանի խոսքով ՝ բազմիցս բարձրաձայնել է այն խնդիրը, որ մեղադրանքի եզրակացությունները պարզ չեն և 300.1-րդ հոդվածը տարածվում է մի իրադարձության վրա, որը տեղի է ունեցել օրենքի ընդունումից մեկ տարի առաջ, այսինքն՝  արարքի պահին դա հանցագործություն չի համարվել։

Մեժլումյանը նշեց, որ պարոն Օհանյանին որպես մեղադրյալ ներգրավելու եզրակացությունում հստակեցված չէ, թե վերագրվող արարքը համապատասխանում է օրենքին, թե ոչ։ Մեժլումյանի խոսքով՝ բազմիցս միջնորդություններ են ներկայացրել՝ պարզելու, թե ե՞րբ է տեղի ունեցել կարգի տապալում և, եթե եղել է կարգի տապալում, ապա երբ է վերականգնվել տապալված կարգը։

Մեժլումյանն ընդգծեց, որ հին օրենքը կիրառելի չէ, իսկ նոր օրենքը ընդունվել է մարտի 1-ի իրադարձություններից մեկ տարի հետո, այսինքն՝ երկու օրենքներն էլ կիրառելի չեն։

Հիշեցնենք, որ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո