Փաստ ինֆո

Նախորդ շաբաթ հայտարարել ենք, հրապարակել ենք 6 կետերը, որոնք մեզ համար խնդրահարույց են և այդ կետերի շուրջ նախարարի կարծիքն իմանալն առաջնային է, հետևաբար այստեղ ենք։ «Փաստինֆո»-ի հետ զրույցում այս մասին ասաց ՀՅԴ ՀԵՄ կենտրոնական վարչության անդամ Քրիստինե Վարդանյանը։ Նշենք, որ ՀՅԴ երիտասարդներն այժմ գտնվում են ԿԳՄՍ նախարարության շենքի դիմաց, նրանք ակնկալում էին ժամը 15։00-ին հանդիպել նախարար Արայիկ Հարությունյանի հետ։

«Նախարարը հրապարակային քննարկման որևէ առաջարկի չի արձագանքել, չնայած իրենց այն պնդումներին, որ պատրաստ են բոլորի հետ, որքան պետք է քննարկեն և մենք նշանակել ենք և՛ օրը, և՛ ժամը, և նույնիսկ եկել ենք նրա աշխատավայրի մոտ, որպեսզի նրա համար դժվարություն չլինի որևէ տեղ գնալը։ Մենք այստեղ ենք և սպասում ենք հանդիպմանը»,-նշեց Քրիստինե Վարդանյանը։
Հարցին՝ ինչ են անելու, եթե նախարարի հետ հանդիպումը չկայանա, Քրիստինե Վարդանյանը նկատեց՝ իրենց բոլոր գործողությունները բխում են իրենց հայտարարության վեց կետերի հնարավորինս շուտ կյանքի կոչման հրամայականից. «Սրանք կեղծ պահանջներ չեն, մենք շարժվում ենք այն ուղղությամբ, որ այս կետերը հնարավորինս շուտ պետք է իրականություն դառնան կամ պատասխան ստանան, ուստի ձեռնարկելու ենք ամեն ինչ»,-նշեց Քրիստինե Վարդանյանը։
Դիտարկմանը, որ բողոքի ակցիաները կրելու են շարունակական բնույթ, Քրիստինե Վարդանյանն ընդգծեց՝ երբ իրենք կհայտարարեն բողոքի ակցիաները դադարեցվել են, այդ ժամանակ կարելի է հայտարարել, որ բողոքի ակցիաները դադարեցված են. «Մենք չենք պատրաստվում դադարեցնել մինչև այս հարցերն իրենց պատասխանները չստանան»,-հավելեց Քրիստինե Վարդանյանը։

Հեղինակ՝ Հասմիկ Կոշկարյան

Աղբյուր` Փաստինֆո