Փաստ ինֆո

Ես Ձեզ վստահեցնում եմ, որ դուք այսօր այս ամբիոնից չէիք խոսելու կոռուպցիոն ռիսկերի և կամազների մասին, եթե չլիներ Երևանի ավագանու «Լույս» խմբակցությունը։ ԱԺ ամբիոնից այս մասին հայտարարեց «Լուսավոր Հայաստան» խմբակցության պատգամավոր Անի Սամսոնյանը՝ դիմելով ԱԺ փոխխոսնակ Լենա Նազարյանին։

«Մենք բացահայտեցինք այդ թեման և եթե մենք չհրապարակեինք դա, Ձեզանից շատերը չէին իմանալու այդ մասին։ Մենք ասում ենք հարգեք մեր ողջամիտ կասկածները այդ կոռուպցիոն գործերի վերաբերյալ։ Իհարկե, տեղեկատվությունը բաց է, թափանցիկ է, եթե չլիներ, մենք չէինք հրապարակի շինթույլտվությունները, բայց, հարգելի գործընկերներ, դուք ընտրել եք մեզ լռեցնելու այլ մեթոդ՝ ոչ թե տեղեկատվությունը թաքցնելու, այլ՝ այլ մեթոդ։ Այս օրերի ընթացքում շատ կանոնակարգված, շատ ուղղորդված, համակարգված ֆեյքային հարձակումներ են եղել «Լուսավոր Հայաստանի» վրա։ Մենք այդ ամենը շատ լավ տեսնում ենք, մենք քարտեզագրում ենք բոլոր ֆեյքերին, գիտենք որ ֆեյքն ում համար է աշխատում, ում դեմ է աշխատում և ամենակարևորը ինչ մեթոդներով է աշխատում։ Ատելության խոսք, զրպարտանք»,-նշեց Անի Սամսոնյանը՝ ընդգծելով, որ իրեն զարմացնում է՝ այս այլանդակությանը մասնակցում են Երևանի ավագանու «Իմ քայլը» խմբակցության անդամները, որոնք Անի Սամսոնյանի պնդմամբ ատելության խոսքը սրում են իրենց խմբակցության դեմ.

«Նրանք սրում են մեր դեմ վիրավորանքը, ատելության խոսքը, որովհետև կոռուպցիոն ռիսկերի վերաբերյալ մեր բերած փաստարկներին նրանք չկարողացան բերել որևէ հակափաստարկ»,-հավելեց Անի Սամսոնյանը։

Վերջինս պաշտոնապես հայտարարեց, որ Երևանի ավագանու ինստիտուտն այսօր իջել է Մայրանյան իջվածքի մակարդակին. «Սա՞ է ազատագրած Երևանի Ձեր ինստիտուտի մակարդակը»,-նշեց պատգամավորը՝ կոչ անելով գործընկերներին Երևանի ավագանու իրենց գործընկերներին սովորեցնել քաղաքական մշակույթ։

Հեղինակ՝ Հասմիկ Կոշկարյան

Աղբյուր` Փաստինֆո