Փաստ ինֆո

Ինձ համար զարմանալի էր, որ խորհրդարանում նման դրական արձագանք է ստացել, ԱԺ նախագահը հատուկ ելույթ է ունեցել այս նախագծի վերաբերյալ, որ քաղաքական մեծամասնությունը կողմ է, բայց ունենք այն, ինչ ունենք։ Այս մասին ԱԺ ամբիոնից հայտարարեց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով ԱԱԾ տնօրենի և ՀՀ ոստիկանապետի պաշտոնների քաղաքական դառնալու վերաբերյալ նախագծին։

Հիշեցնենք, որ երեկ ԱԺ պետաիրավական հանձնաժողովի նիստում Ազգային անվտանգության ծառայության տնօրենի և ոստիկանապետի պաշտոնները քաղաքական դարձնելու նախագիծը բացասական եզրակացություն ստացավ։ Էդմոն Մարուքյանը հավելեց, որ նախագծով առաջարկում էին նաև խմբագրություններին իրավունք վերապահել գրության միջոցով ԱԱԾ և ոստիկանության ղեկավարներին հրավիրել և տալ հարցեր։

«Ասվում է, որ եկեք սահմանադրական սովորույթը զարգացնենք, այսինքն հրավիրենք իրենք կգան և դա դառնա սահմանադրական սովորույթ։ Էլ ինչի՞ ենք ստեղ գրում։ Եվ եթե էդպես լիներլ, օրինակ սահմանադրության մեջ էլ չէինք գրի, որ կառավարության հետ հարցուպատասխան կա, կհրավիրեինք կգային։ Բայց սահմանադրական սովորութը կարող է նաև վատ նախադեպով լինել. Հրավիրենք չգա ու դա դառնա սովորույթ։ Հետևաբար շատ կարևոր է, որ խորհրդարանական կառավարման երկրում խորհրդարանական վերահսկողության մեխանիզմներ լինեն անվտանգության սեկտորի նկատմամբ։ Եվ անվտանգության սեկտորի այն հատվածը, որը սրբորեն պահպանվում և պաշտպանվում էր նախկին իշխանությունների կողմից, էդ հատվածը շարունակում է նաև պահպանվել և պաշտպանվել այսօրվա իշխանությունների կողմից, ինչը որևէ լավ բանի չի տանելու»,-նշեց Էդմոն Մարուքյանը։

ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանն էլ ընդգծեց, որ յոթերորդ գումարման ԱԺ ձևավորումից հետո դեպք չի արձանագրվել, երբ պետական կամ տեղական ինքնակառավարման որևէ մարմին մերժի խմբակցություններից որևէ մեկի հրավերքը՝ մասնակցելու խմբակցությունների կողմից կազմակերպված քննարկումներին. «Իմ կարծիքով սա լավագույն ապացույցն է նրա, որ մենք գնում ենք այս սահմանադրական սովորույթը ձևավորելու ճանապարհին»,-նշեց Վլադիմիր Վարդանյանը՝ ընդգծելով, որ վարչապետի ենթակա մարմինների վրա դնել այնպիսի պարտականություն, որ խմբակցության կանչով որոշակի ժամանակահատվածում ներկայանան քննարկմանը և պատասխանել խմբակցությունների կողմից բարձրացված հարցերին, նշանակում է որոշակի առումով ոչ թե ուժեղացնել խորհրդարանական վերահսկողությունը, այլ մխրճվել գործադիրի աշխատանքների մեջ։

Հեղինակ՝ Հասմիկ Կոշկարյան 

Աղբյուր` Փաստինֆո