Փաստ ինֆո

ՀՀ ԱԺ «Լուսավոր Հայաստան» եւ «Բարգավաճ Հայաստան» խմբակցությունների պատգամավորներն այցելել են ոստիկանության բաժիններ, որտեղ գտնվում էին բերման ենթարկված ՀՅԴ երիտասարդները։

Հիշեցնենք, ԿԳՄՍ նախարար Արայիկ Հարությունյանի հետ երկխոսելու եւ իրենց բարձրացրած հարցերի շուրջ բովանդակային քննարկում ծավալելու նպատակով ՀՅԴ-ական երիտասարդներն ու ուսանողները 15։00-ից հավաքվել էին նախարարության շենքի առջեւ, սակայն ոստիկանության միջոցով նախարար Հարությունյանը փոխանցել էր, որ համապատասխան ընթացակարգեր կան, որոնք երիտասարդները պետք է պահպանեն։ Այս պատասխանից հետո երիտասարդները որոշեցին խաղաղ քննարկում սկսել եւ որոշել հետագա անելիքները, մինչդեռ ոստիկանությունը նրանց 5 րոպե ժամանակ տվեց եւ բռնի ուժով նախ նախարարության մուտքի մոտից, ապա Վազգեն Սարգսյան փողոցից հեռացրեց՝ հայտարարելով, թե գործում է համաչափության սկզբունքից ելնելով։ Ոստիկանությունից «Փաստինֆո»-ին հայտնեցին, որ 24 երիտասարդ բերման է ենթարկվել։

Պատգամավորների փոխանցմամբ՝ ոստիկանության բաժանմունքներում ամեն ինչ խաղաղ է եղել եւ բերման ենթարկվածները բողոք չեն ներկայացրել։

«Ոստիկանության բաժանմունքում խաղաղ էր, ոստիկաններն իրենց գործն էին անում, բերման ենթարկվածները հանգիստ նստած էին։ Ես զրուցել եմ բոլորի հետ, ոստիկանական բաժանմունքից որևէ բողոք չկար, նրանք գոհ էին ոստիկանական գործողություններից, միայն խնդիր կար, որ չէին թողել հեռախոսն օգտագործել, սակայն այն մենք տեղում հարթեցինք»,-Ոստիկանության բաժանմունքից դուրս գալուց հետո ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը։

Սամսոնյանը նշեց, որ որոշ երիտասարդներ բերման ենթարկվելը ոչ իրավաչափ են համարել. «Մենք այդ մասով նաև խոսեցինք բաժանմունքի պետի հետ, եթե կլինեն բողոքներ, ապա դրանց ընթացք կտան։ Այս պահին կազմվում են արձանագրությունները։ Ոստիկանությունում նաև բողոքի է ստացվել, որ խոչնդոտել են անձի տեղաշարժման հնարավորությունն ու Ոստիկանությունը դրանով էլ է զբաղվելու»։

ԲՀԿ քարտուղար Արման Աբովյանն էլ նշեց, որ պետք է հասկանալ՝ ինչն է խնդիրը, որ ԿԳՄՍ նախարար Արայիկ Հարությունյանը չի ուզում հանդիպել երիտասարդների հետ. «Որ իրենք չե՞ն լսի իրեն, կամ ասենք իմաստ չկա՞։ Սա բերելու է շատ վատ հետևանքների։ Շատ կարևոր է հասկանալ ուժի կիրառման համաչափությունը։ Մենք հանդիպեցինք բոլոր երիտասարդների հետ, որոնք այս պահին ոստիկանությունում էին, տրամադրությունները լավ էր, ժպտում էին»։

Աբովյանը նշեց, որ ուժի կիրառման այս դեպքը խորը ուսումնասիրությունների առարկա պետք է դառնա. «Դրանում թող ոչ ոք չկասկածի։ Ամենակարևորն այն է, որ մեր արած կոչը՝ պետք է հանդիպում լինի, երկխոսություն լինի, նախարարը պետք է լսի ուսանողներին, լսի նույնիսկ այն մարդկանց, ովքեր իրեն դուր չեն գալիս, իսկ եթե չի լսում, դա բերում է այսպիսի իրավիճակների»։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո