Փաստ ինֆո

«Մեր երիտասարդները քաղաքականապես բավականաչափ հասուն մարդիկ են և կարող են իրենց քայլերն անել, կշռադատել իրենց գործողություններն ու դրա հետևանքները, իսկ եթե թաքնված իմաստ են փնտրում, ապա ոչ, մենք մեր երիտասարդների հետևում չենք թաքնվում»,-այս մասին այսօր լրագրողների հետ ճեպազրույցում ասաց ՀՅԴ Գերագույն մարմնի անդամ Արթուր Խաչատրյանը՝ անդրադառնալով հարցին՝ արդո՞ք ավագ դաշնակցական ընկերներն օգնում են երիտասարդներին և ուղղություն ցույց տալիս։

Նա նշեց, որ խորհրդարանական ընդդիմությունից ավելի ակտիվ գործողություններ էին ակնկալում, կարծում էին, որ այդ հարցը պետք է բարձրացվեր։

ՀՅԴ Հայաստանի գերագույն մարմնի անդամ, նախկին պատգամավոր Լիլիթ Գալստյանն էլ ավելացրեց, որ ԿԳՄՍ նախարարի պահվածքը տարակուսելի է՝ թաքնվում է երիտասարդներից վեցնապատիկ անգամ ավելի ուժերի թիկունքում, ինչը ոչ միայն տղամարդավայել չէ, այլ ուղղակի պաշտոնյային անհարիր է խուսանավել բանավեճից։  «Կարելի էր ժողովրդավարության գործիքակազմից օգտվել և երիտասարդներին հրավիրել քննարկման և բովանդակային քննարկման շնորհիվ հասնել կոմպրոմիսային կամ այլ տարբերակի»։ Ըստ նրա՝ այսօր Հայաստանում տեսակների, արժեհամակարգի պայքար է։

Դիտարկմանը, որ Արմեն Ռուստամյանը հաճախ ասում էր, թե փողոցում հարցեր չեն լուծվում, Գալստյանը պատասխանեց. «Նորից տանում եք դեպի հին Հայաստան։ Հարցերը փողոցում են լուծվում սովորաբար այն ժամանակ, երբ կլոր սեղանի, բանավեճի, քաղաքական երկխոսության ռեսուրսները սպառված են։ Երբ Փաշինյանը ԱՄՆ-ի հայ համայնքի հետ էր հանդիպում երկխոսության մասին հրաշալի ելույթներ ունեցավ, բայց փորձը և իշխանության մեկ ու կես տարվա գործունեությունը հրաշալիորեն ապացուցում է, որ նրանք մերժում են երկխոսության ցանկացած ձև և խնդիրների լուծելի ճանապարհը մնում է փողոցը»։

Աղբյուր` Փաստինֆո