Փաստ ինֆո

Ինչի՞ համար եք իրար խառնվել ժողովուրդ։ Ծառուկյանն էդ ի՞նչ ասեց, որ բոլորը միանգամից վատացան։ Ծառուկյանը մենակ մի բան է ասել, որ եթե ուզում եք ներդրող գա, ուրեմն ներդրողի համար պայման ստեղծեք։ Ազգային ժողովում ասաց ԱԺ «Բարգավաճ Հայաստան» խմբակցության քարտուղար Արման Աբովյանը։

«Ցավում եմ, որ մինչ օրս բիզնեսմենի և սեփականատիրոջ տարբերությունը չեք կարողանում հասկանալ։ Երևումա ես կուրսեր պետք է բացեմ առոգանության, լատիներենի ու բացատրեմ՝ որն է տարբերությունը»,-նշեց Արման Աբովյանը։
Նա իշխանական պատգամավորներին կոչ արեց դիտել Գագիկ Ծառուկյանի ճեպազրույցը և չնեղանալ. «Միակ խնդիրն այն է, որ դուք լսում եք, բայց չեք ընկալում։ Ձեզ համար վիրավորական է, ի՞նչն է վիրավորական, որ ներդրողա փախել Հայաստանի՞ց։ Ասում ենք պայման ստեղծեք, ուրիշ տարբերակ չունենք»,-հավելեց Արման Աբովյանը։

Հիշեցնենք, որ այսօր ԲՀԿ առաջնորդ Գագիկ Ծառուկյանը լրագրողների հետ զրույցի ժամանակ հայտարարեց, որ Հայաստան են եկել Աբու Դաբիի թագաժառանգն ու Արաբական Միացյալ Էմիրությունների «Ռոտանա» հյուրանոցային ցանցի սեփականատերը, որոնք ցանկություն են հայտնել Հայաստանում ներդրումներ կատարել, սակայն քաղաքապետի և գլխավոր ճարտարապետի հետ հանդիպումից հետո սառեցրել են ներդրումային ծրագրերը։

«Երևանի քաղաքապետի ու ճարտարապետի հետ այդ հանդիպումը տեղի է ունեցել կես ժամ ու մարդիկ հիասթափված դուրս են եկել և մոռացել իրենց ներդրումների մասին։ Եթե մարդը գալիս է Երևանում ուզում է կառուցի երկու հյուրանոց և պատրաստ է վճարելու ցանկացած գին, մինչև անգամ վթարային շենք գնել։ Թագաժառանգն էլ ուզում էր իր հոր անունով հիվանդանոց կառուցել, որ մարդիկ գային օգտվեին»,-նշեց Գագիկ Ծառուկյանը։

Հեղինակ՝ Հասմիկ Կոշկարյան

Աղբյուր` Փաստինֆո