Փաստ ինֆո

«Ոստիկանությունը անհամաչափ ուժ կիրառեց, բայց մինչեւ ոստիկանական գործողություններին գնահատական տալը պետք է ասեմ, որ զավեշտալին իմ աչքի առաջ գործող իշխանությունների վերջնական կորուստն էր։ Ո՞նց կարող էր  ժողովրդավարության, նոր Հայաստանի, 3 միլիոն վարչապետի  անունից խոսող  իշխանության ներկայացուցիչը, որը կրթության, գիտության , մշակույթի,  սպորտի եւ երիտասարդության հարցերի  նախարարն է,  մերժել երիտասարդների՝ բովանդակային քննարկման առաջարկը,-  «Փաստինֆո»- ին ասաց ՀՅԴ ԳՄ անդամ Լիլիթ Գալստյանը ՝ անդրադառնալով ԿԳՄՍ նախարարության շենքի առջեւ տեղի ունեցած միջադեպին։

Հիշեցնենք, ԿԳՄՍ նախարար Արայիկ Հարությունյանի հետ երկխոսելու եւ իրենց բարձրացրած հարցերի շուրջ բովանդակային քննարկում ծավալելու նպատակով ՀՅԴ-ական երիտասարդներն ու ուսանողները 15։00-ից հավաքվել էին նախարարության շենքի առջեւ, սակայն ոստիկանության միջոցով նախարար Հարությունյանը փոխանցել էր, որ համապատասխան ընթացակարգեր կան, որոնք երիտասարդները պետք է պահպանեն։ Այս պատասխանից հետո երիտասարդները որոշեցին խաղաղ քննարկում սկսել եւ որոշել հետագա անելիքները, մինչդեռ ոստիկանությունը նրանց 5 րոպե ժամանակ տվեց եւ բռնի ուժով նախ նախարարության մուտքի մոտից, ապա Վազգեն Սարգսյան փողոցից հեռացրեց՝ հայտարարելով, թե գործում է համաչափության սկզբունքից ելնելով։ 24 երիտասարդ բերման է ենթարկվել։

Լիլիթ Գալստյանը  անընդունելի համարեց նախարար Հարությունյանի պահվածքը՝ շեշտելով, որ բովանդակային քննարկման առաջարկին , փաստորեն նա պատասխանեց ոստիկանության թիկունքում թաքնվելով։ «20 դատարկ ձեռքերով սեփական կրթության իրավունքը  պաշտպանող երիտասարդներին  չեզոքացնել իրենց մի քանի տասնյակ անգամներ գերազանցող ոստիկանական ուժերի կողմից եւ թաքնվել ոստիկանների թիկունքում...Բա  Դուք ժողովրդի իշխանությունն էիք, այ Արայիկ Հարությունյան, բա Դուք «դուխով»-ն էիք։ Այստեղ «դուխ» չկա, սա  քստմնելի վարքագիծ է՝ մերժել երկխոսությունը»,-հայտարարեց Լիլիթ Գալստյանը՝ շարունակելով, թե իշխանությունը մոռացել է , որ ժողովրդավարական, իրավական ու սոցիալական պետություն կառուցելու հայտարարություններ էր արել։

«Իրենք կարծում են, թե միայն «դուխով»-ների նախարար են։ Այդ երիտասարդները ՀՀ  քաղաքացիներ են, որոնք պայքարում են իրենց ինքնության, արժանապատիվ կրթության եւ վաղվա Հայաստանի համար»։

Լիլիթ Գալստյանի խոսքով, այսօր Հայաստանում արժեհամակարգային  պայքար է ընթանում. «Սա արժեքային համակարգերի բախում է, մի կողմից «նոր Հայաստան»-ն է, որ գալիս է ջնջելու մեր ինքնությունն ու  ոգեղենականությունը, այն արժեքները, որոնց վրա պետք է կառուցվի ազգային պետականությունն ու ժողովրդավարական պետությունը, մյուս կողմից՝ դրսից սնվող օտարածին օրակարգն է, որը  եկել է  թիրախավորելու ազգային ընտանիքը, ազգային պետությունը, ազգային եկեղեցին եւ ազգային կրթությունը։ Դա շատ հստակ է»։

Լիլիթ  Գալստյանը համոզված է՝ ոստիկանությունը ուժ գործադրեց իշխանությունների հրահանգով, որովհետեւ Հայաստանում ոչինչ չի փոխվել. «Ոստիկանությունը ինչպես ծառայում էր իշխանությանը, այսօր էլ է ծառայում իշխանությանը»։

Լիլիթ Գալստյանը մեզ հետ զրույցի պահին շտապում էր Ոստիկանություն, որտեղ բերման ենթարկվածների թիվը, ոստիկանության հաղորդմամբ, 24-ի է հասնում։ «Մեր երիտասարդների ոգին դրանից չի կոտրվի, որովհետեւ իրենք սկզբունքի համար են պայքարում, արժեքների համար են պայքարում, արժանապատիվ Հայաստանի եւ ազգային պետության համար են պայքարում։ Այս գործողությունը չի կոտրի նրանց, մանավանդ, որ երիտասարդները  դուրս էին եկել բովանդակային քննարկման»,- ասաց Լիլիթ Գալստյանը՝ հավելելով, որ նախարար հարությունյանին տրվել էր լավագույն հնարավորությունը՝ երիտասարդներին իր աշխատասենյակ հրավիրել, երկխոսել նրանց հետ եւ  վերջապես, լինել համոզիչ։

Եզրափակելով զրույցը ՀՅԴ  ԳՄ անդամն ընդգծեց՝ նորանկախ Հայաստանի 30 տարիների ընթացքում  այսքան փակ ու վախկոտ իշխանություն չի հիշում . «Ժողովրդավարությունն այսպիսի դեմքով չի լինում, սա անվստահ իշխանության  դիմագիծ է՝ իր իսկ հայտարարած արժեքներից  փախչող»։

Աղբյուր` Փաստինֆո