Փաստ ինֆո

Սա պատվով, առանց որևէ գնահատականի հեռանալու հնարավորություն է։ Չի կարող որևէ կերպ որակվել որպես նվաստացուցիչ, ավելին ասեմ՝ գործող Սահմանադրական դատարանի մասին օրենքով արդեն իսկ կա կարգավորում, որ մինչև տարիքային շեմը լրանալը ՍԴ դատավորները կարող են դիմել վաղ կենսաթոշակի։ Լրագրողների հետ զրույցի ժամանակ ասաց Արդարադատության նախարար Ռուստամ Բադասյանը։

Հարցին, եթե որևէ դատավոր չցանկանա դիմել, ինչպե՞ս են պատրաստվում այդ դեպքում լուծել սահմանադրական ճգնաժամը, նախարարն արձագանքեց. «Այսօր պարոն Մարուքյանն ասաց ես էլ համաձայնեցի, որ կարելի է անդրադառնալ սահմանադրական բարեփոխումների շրջանակներում, արդեն անդրադարձել ենք դատական օրենսգրքին, որով ներդրել ենք կարգապահական վարույթների հարուցման նոր մեխանիզմներ, գույքային դրության ստուգման մեխանիզմներ։ Դրանք վերաբերելու են ոչ միայն ՍԴ դատավորներին, այլ առհասարակ ամբողջ դատական համակարգին»,-նշեց Ռուստամ Բադասյանը՝ ընդգծելով, որ դրանք բոլորը ստանալու են օրենքի տեքստ և դրանց միջոցով հնարավորություն են ունենալու՝ ստուգել բարձրաստիճան պաշտոնատար մարդկանց բարեվարքությունը։

Դիտարկմանն արդյոք դա որպես ճնշում չի ընդունվի, որ եթե դատավորները թոշակի չանցնեն, կստուգեն նրանց գույքը, նախարարն ասաց. «Ներողություն, եթե իմ խոսքն այդպես ընկալվեց»։

Ռուստամ Բադասյանն ընդգծեց՝ իշխանությունը նպատակ ունի ներդնել բարեվարքության ստուգման այնպիսի մեխանիզմներ, որը հնարավորություն կտա թե՛ դատական համակարգում, թե՛ պետական իշխանության այլ մարմիններում ունենալ այնպիսի մեխանիզմներ, որպեսզի հանրության վստահությունը բարձրանա այդ մարմինների նկատմամբ։

Անդրադառնալով հարցին՝ հանրությունը պատրաստ է իր գրպանից վճարել այն դատավորներին, որոնց հանրությունը չի վստահում, նախարարը նկատեց՝ դա պարզ շահարկումների դաշտում է. «Ինչու՞ ոչ մեկի մոտ մինչ այժմ հարց չի առաջանում, ինչու են ամեն ամիս աշխատավարձ տալիս ամբողջ դատական համակարգին կամ այլ մարմիններում։ Պետք է լինի որոշակի շարունակականություն, տրամաբանություն։ Այն փաստարկը, որ չաշխատելով ստանալու են, ասում եմ՝ այսօր էլ կարող են դիմել, չաշխատելով ստանալ, իհարկե, այլ գումար։ Կենսաթոշակի իմաստը դա է, որ մարդիկ չեն աշխատում։ Վաղ կենսաթոշակի իմաստն այն է, որ մինչև կենսաթոշակի տարիքը լրանալն իրենք հնարավորություն են ստանում վաղ կենսաթոշակի, հետևաբար հարկատուների գումարների և այլնի մասին։ Ի՞նչ գին ենք վճարում, եթե վստահ չենք՝ արդարադատությունը ՀՀ-ում իրականացվում է»,-նշեց Ռուստամ Բադասյանը։

Հեղինակ՝ Հասմիկ Կոշկարյան

Աղբյուր` Փաստինֆո