Փաստ ինֆո

ԱԺ պետաիրավական հանձնաժողովում այժմ քննարկվում է «Սահմանադրական դատարանի մասին ՀՀ սահմանադրական օրենքում փոփոխություններ և լրացումներ» կատարելու մասին օրենսդրական նախաձեռնությունը։

Հիշեցնենք, որ խոսքը գնում է դատավորների վաղ կենսաթոշակի անցնելուն, համաձայն որի՝ նախատեսվում է մինչև 2020 թվականի հունվարի 31-ը ՍԴ դատավորի հրաժարական ներկայացնելու դեպքում նրա լիազորությունները դադարելուց մինչև սահմանադրությամբ սահմանված պաշտոնավարման տարիքը լրանալը, ստանում է կենսաթոշակ հրաժարականի պահին ստացած պաշտոնային դրույքաչափի և հավելաչափի չափով։

Հարցը զեկուցող, Արդարադատության նախարար Ռուստամ Բադասյանն նկատեց՝ սա Սահմանադրական դատարանի շուրջ ստեղծված ճգնաժամը լուծելու կառավարության հերթական նախաձեռնությունն է։ Նախարարը հավելեց, որ առաջարկվող կարգավորումներն ուղարկվել են Վենետիկի հանձնաժողով, որտեղից ստացել են իրավական կարծիք. «Մենք որոշել ենք, որ կամավոր վաղ կենսաթոշակի հատվածը պետք է առանձին օրենսդրական նախաձեռնությամբ բերենք ԱԺ։

Նշեմ, որ ուսումնասիրել ենք նաև միջազգային փորձը։ Օրինակ Վրաստանում դատական համակարգի փոփոխությունների համատեքստում կարգավորում է նախատեսել, որը հնարավորություն է տվել 2005 թվականի հունվարի 1-ից 2006 թվականի հունվարի 1-ը Գերագույն դատարանի դատավորներին այդ պաշտոնում երեք տարի աշխատելու և ՍԴ դատավորներին այդ պաշտոնում հինգ տարի պաշտոնավարելու դեպքում հրաժարական ներկայացնելիս ցմահ ստանալ նրանց հրաժարականի պահին ունեցած աշխատավարձի չափով դրամական ապահովում»,-նշեց Ռուստամ Բադասյանը։

Ռուստամ Բադասյանն ընդգծեց, որ սահմանադրական այս օրենքը մշակելիս սահմանադրության անցումային դրույթների հետ կապված խնդիր է եղել, մասնավորապես կյանքի կոչելու համար 2015 թվականի փոփոխություններով ՍԴ-ի նոր մոդելը կյանքի կոչելը. «Այդ մոդելի համաձայն՝ ՍԴ անդամների մի մասին առաջադրում է դատավորների ընդհանուր ժողովը, մի մասին կառավարությունը, մի մասին նախագահը։ Բնականաբար բոլորն ընտրվում են ԱԺ-ի կողմից և խնդիրը կայանում է նրանում, որ ՍԴ գործող կազմի դատավորների մեծամասնությունն արդեն իսկ պաշտովարում էին, հետևաբար սահմանադրական նոր դատարան ունենալու տեսլականն այդպես էլ կարող է իրականություն չդառնար։ Սա ևս մեկ հնարավորություն է՝ լուծելու ՍԴ-ի շուրջ ստեղծված ճգնաժամը, մասնավորապես ՌԴ-ում պատվավոր հեռանալ, պատվավոր հեռացվել տերմիններն են օգտագործվում և մենք էլ ենք նույն իմաստը դնում՝ ասելով, որ հանրության ցածր վստահության մակարդակը դատական համակարգի, այդ թվում ՍԴ-ի նկատմամբ, լուծելու առումով մենք անձանց վիրավորելու կամ նրանցից ձերբազատվելու խնդիր չենք ուզում դնել, այլ պատվավոր հեռանալու ինստիտուտն ենք ուզում ներդնել՝ պահպանելով նրանց սոցիալական երաշխիքները»,-հավելեց Ռուստամ Բադասյանը։

Հեղինակ՝ Հասմիկ Կոշկարյան

Աղբյուր` Փաստինֆո