Փաստ ինֆո

Առաջին ընթերցմամբ կողմ էինք քվեարկել և մենք հակված ենք նրան, որ իրոք ԱԱԾ-ում և ոստիկանությունում լուրջ բարեփոխումների կարիք կա։ Լրագրողների հետ զրույցում ասաց ԱԺ պետաիրավական հանձնաժողովի նախագահ Վլադիմիր Վարդանյանը՝ անդրադառնալով ԱԱԾ տնօրենի և ոստիկանապետի պաշտոնները քաղաքական դարձնելու նախագծին տված բացասական եզրակացությանը։

«Բարեփոխումների կարիք կա նաև այն եղանակով, որպեսզի կարողանաս ընդգրկել այն անձանց, որոնք համակարգի ներսից չեն, որպեսզի համակարգին նոր շունչ տաս։ Բայց դրան զուգահեռ փորձ էր կատարվում որոնել լուծումներ, որոնք կլինեին սահմանադրական և կլինեին այնպիսին, որոնք չէին խարխլի համակարգը։ Մենք բավական երկար քննարկել ենք։ Բարձրացվեց սահմանադրականության հարց և մենք առաջարկեցինք դեմ քվեարկել նախագծին։ Մենք այս ամբողջ ընթացքում աշխատել ենք և փորձել ենք լուծումներ գտնել։ Լուծումները խնդրահարույց են, որովհետև ցանկացած լուծում, որը փորձում ենք որոնել կա՛մ սահմանադրականության հետ խնդիրներ է առաջացնում, կա՛մ համակարգում ներքին համերաշխությունը կարող է վերացնել»,-նշեց Վլադիմիր Վարդանյանը՝ հավելելով, որ ի վերջո հանգեցին այն եզրակցության, որ աշխատանքները պետք է շարունակվեն այս ուղղությամբ և բարեփոխել այս համակարգերը։

Վլադիմիր Վարդանյանն ընդգծեց՝ իրենց պետք չեն սիտուատիվ լուծումներ, այլ պետք են ինստիտուցիոնալ լուծումներ, որոնք կհանգեցնեն նրան, որ վաղ թե ուշ ունենալու ենք եվրոպական չափանիշներին բավարարող ոստիկանություն և միջազգային չափանիշներին բավարարող ԱԱԾ։

Հեղինակ՝ Հասմիկ Կոշկարյան

Աղբյուր` Փաստինֆո