Փաստ ինֆո

Գործարար Խաչատուր Սուքիասյանն այսօր լրագրողների հետ ճեպազրույցում ՀՀ 3-րդ նախագահ Սերժ Սարգսյանի վերաբերյալ ուշագրավ հայտարարություններ է արել։

Խաչատուր Սուքիասյանը, մասնավորապես ասել է. «Սերժ Սարգսյանը շատ վատ ղեկավար է եղել, ամեն ինչ արել է իր, իր փեսայի, իր չգիտեմ ում համար։ Սերժ Սարգսյանին լավ եմ ճանաչում։ Եթե նա ինձնից գործարան է խլել, ես չեմ կարծում, որ նրա հետ լավ հարաբերություն կարող էի ունենալ։ Նա վատ ղեկավար է եղել, վատ ընկեր է։ Երբ երկիրը կառուցվում էր, հիշում եմ իրեն, երբ Ղարաբաղից եկավ, բոլոր իր հին ընկերներին մոռացավ, մինչև անգամ նրան, ումից ընդունեց նախագահությունը։ Հետո, խաբելը շատ վատ բան է։ Եթե մարդը առաջին դեմքի մակարդակով կարող է սուտ խոսել, կործանված է և այդ մարդը, և այդ միջավայրը»Այս հայտարարությունից հետո շատերը հիշեցին Խաչատուր Սուքիասյանի՝ նախկինում արած հայտարարությունները ու այն փաստը, որ 2018 թվականի իրադարձություններից առաջ, 2016 թվականի մարտի 4-ին Խաչատուր Սուքիասյանին պատկանող «Ռոսիա մոլ»-ի Սերժ Սարգսյանը ոչ միայն ներկա է եղել , այլեւ անձամբ է կտրել կարմիր ժապավենը։ Ֆեյսբուք սոցիալական ցանցի քաղաքական հատվածը ակտիվորեն հրապարակում է Սերժ Սարգսյանի ու Խաչատուր Սուքիասյանի՝ այդ օրվա համատեղ համատեղ լուսանկարները։

Այն ժամանակ Խաչատուր Սուքիասյանին լրագրողները հարցրել էին 2008-ի քաղաքական իրադարձությունների ու «Բջնի» գործարանի վերաբերյալ, ինչը, փաստորեն չէր խոչընդոտել, որ Սերժ Սարգսյանը ներկա գտնվի համալիրի բացմանը։ Սուքիասյանը պատասխանել էր. «Պատկերացնում եք, Խաչատուր Սուքիասյանը սկսի անձնավորել էդ խնդիրները, կարծում եմ՝ դա ժամանակակից մոտեցում չէ։ Հասկանում եք, չէ՞, սա որքան ժամանակակից քաղաքակիրթ մոտեցում է անկախ ամեն ինչից։ Ես իմ երկրում կառուցում եմ, ստեղծում եմ, եւ հասարակության, եւ երկրի համար։ Ես սրանով նույնպես ապացուցում եմ, որ ես ստեղծող արարող ճանապարհի մարդ եմ», իսկ լրագրողների հարցին, թե փաստորեն, այսօր Սերժ Սարգսյանի հետ բարիդրացիական հարաբերություննե՞ր ունեք: գործարարն արձագանքել էր.«Ես բարիդրացիական հարաբերություններ ունեմ ե՛ւ Սերժ Սարգսյանի, ե՛ւ շատերի հետ։ Այո, ունեմ բարիդրացիական հարաբերություններ: Կարծում եմ՝ վերջին տարիներին Հայաստանում տարբեր պաշտոններ է զբաղեցրել, բավականին տեղեկացված մարդ է։ Ամեն ինչից տեղյակ է, կարծում եմ՝ նա նույնպես խրախուսում է, որպեսզի Հայաստանը զարգանա»։

Ի դեպ, այն ժամանակ գործարարը Հայաստանում զարգացման միտումներ էր նկատում։ Նույն օրը Սուքիասյանը լրագրողներին ասել էր, թե երբ համեմատում ենք 5-5 տարվա փուլերով եւ հաշվի առնում համաշխարհային զարգացումները, որոնք, իհարկե, մեզ մոտ դանդաղ տեմպերով են, զարգացման միտումներ նկատվում են Հայաստանում։

Ուշագրավ է, որ Սերժ Սարգսյանի նախագահության օրոք, 2017 թվականին Խաչատուր Սուքիասյանի հետ առնչություն ունեցող «Սիլ ինշուրանս»-ը , ըստ մամուլի տեղեկությունների, 2 մլն 132 հազար դրամի պայմանագիր էր կնքել նախագահականի հետ, որի շրջանակում «Սիլ ինշուրիանսն» իրականացրել էր կառույցին պատկանող 73 ավտոմեքենաների ապահովագրությունը»:

Այս կապակցությամբ Սուքիասյանն այսօր հայտարարել է.«Ինքը ինշուրանս է, ի՞նչ պետք է անի խոզաբուծությա՞մբ զբաղվի կամ 3 միլիոն դրամը պետական շրջանառության մեջ ի՞նչ է նշանակում որ»։

Աղբյուր` Փաստինֆո