Փաստ ինֆո

Պետք է սկսենք վստահել համակարգին։ Այս մասին ադամանդանդագործական ընկերության արտադրամասի բացմանը՝ լրագրողների հետ ճեպազրույցում հայտնեց գործարար Խաչատուր Սուքիասյանը։

Վերջինս նշեց, որ ինչ-որ գործընթաց է սկսվել և այն անձինք, որոնք աշխատել են «Բջնի» գործարանում կանչվում են հարցաքննության։ Հարցին՝ ճի՞շտ է որ ինքը ցանկանում է վերադարձնել գործարանը, Սուքիասյանը նշեց, որ հարցը տեղին չէ, որովհետև գործարանն անօրինական է խլվել. «Այն պետք է իրավական ճանապարհով վերադարձվի: Այն իրավական ճանապարհով չի վերցվել: Իսկ հիմա այն ինչ տեղի է ունենում, դրա հակառակն է, ինչ եղել է տարիներ շարունակ»: Սուքիասյանի կարծիքով՝ համակարգին վստահելու դեպքում մենք էլ կդառնանք այն երկրներից, որտեղ քաղաքացին վստահում է ցանկացած պաշտոնյայի։ «Իհարկե, այսօր կան պաշտոնյաներ, որոնք չեն համապատասխանում, ձախողվել են և թույլ են, սակայն կան նաև պաշտոնյաներ, որոնք փայլուն կատարում են իրենց աշխատանքը»,-ասաց նա Խոսելով տարիներ առաջ տեղի ունեցող դեպքերի մասին, Սուքիասյանը նշեց, որ այն ժամանակ շատ գործարարների առաջարկվել է գալ այսեղ և գործարաններ բացել, սակայն նրանք հրաժարվել են, քանի որ բոլորն ուզեցել են փայ մտնել, իսկ այսօր արդեն այդ խնդիրը չկա։ «Այն խնդիրները, որոնք որ եղել են և խոչընդոտ են հանդիսացել, այսօր արդեն չկան ։ Նախ՝ առաջինը միլիոնը փոքր բիզնեսի համար լավ գիտենք, որ ազատված է։ Դրանից հետո պարզեցված հարկը թողել են՝ 58 միլիոն։ Հաստատագրված վճարը, երկար տարիներ ասում էինք, որ դա պետք է փոխվի։ Այն ժամանակ չէին փոխում, իսկ հիմա փոխել են արդեն շրջանառության հարկ է և բոլորը գոհ են։ Ես շուկան շատ լավ եմ տիրապետում »,-նշեց գործարարը։

Անդրադառնալով Գագիկ Ծառուկյանի հայտարարությանը, որ հետհեղափոխական Հայաստանում դեռևս բիզնեսը զարգացնելու համար բարենպաստ պայմաններ չկան, Սուքիասյանը նշեց, որ չի կիսում Գագիկ Ծառուկյանի կարծիքը։ «Եթե պարոն Ծառուկյանը ասում է, որ խնդիրներ կան, պետք է այդ խնդիրներով զբաղվել, որ դրանք այլևս չլինեն։ Եթե խոսքը նրա մասին է, որ հողի կատեգորիա պետք է փոխվի, դա արդեն ուրիշ ինստիտուտ է։ Մեկ պատուհան պետք է լինի և կարծում եմ, որ կլինի։Ես չեմ կարծում, որ հիմա գործարարներն օրենքից դուրս խնդիրներ են ունենում։ Կարծում եմ գործարարներն այս պահին կունենան օրենքի սահմաններում խնդիրներ։ Շատ դեպքերում իմ ընկերներն էլ են ինձ ասում էսպիսի բան կա, ճշտում ենք տեսնում ենք, որ էդպես չէ»։ Հարցին, արդյո՞ք Հայաստանում տնտեսական հեղափոխությունը թափ է առնում, Սուքիասյանը նշեց, որ եթե Հայաստանում կոռուպցիան վերացած է, հավասար պայմաններ է, եթե հակամենաշնորհային գործիքները գործում են՝ դա արդեն հեղափոխություն է։ «Ուղղակի մարդիկ պետք է համոզվեն, որ ազատություն կա և սկսեն ներդրումներ անել։ Չմտածեք, որ ՀՀ-ում ԱՄՆ կամ Ճապոնիայի մակարդակի մեծ գումարներ ներդրում լինի։Պետք է բազմազան ներդրումներ լինեն։ Սա փոքր երկիր է չի կարող շատ մեծ գումարների մասին խոսք գնալ»։

՝

Աղբյուր` Փաստինֆո