Փաստ ինֆո

«Փաստինֆո»-ի հարցերին պատասխանում է ԱԺ «Իմ քայլը» խմբակցության պատգամավոր, ադրբեջանագետ Տաթևիկ Հայրապետյանը։

- Ադրբեջանական ընդդիմությունն արդեն որոշե՞լ է մասնակցելու է արտահերթ խորհրդարանական ընտրություններին, թե ոչ։ Ներքաղաքական իրավիճակն ինչպիսի՞նն է և ինչպե՞ս է ազդելու այն Հայաստանի վրա։

- Հենց այսօր խորհրդարանն ինքնալուծարման մասին հայտ ներկայացրեց։ Առաջիկայում պարզ կդառնա մոտակա ընտրությունների օրը, որը չի կարող լինել երկու ամսից շուտ։ Ընտրությունները կնշանակվեն մոտավորապես փետրվար-մարտ ամիսներին։ Ինչ վերաբերում է ընդդիմությանը, ապա ըստ էության ընդդիմադիր ճամբարը փոքր ինչ և՛ վրդովված է, և՛ անհասկանալի վիճակում է գտնվում, որովհետև այս տարվա աշնան սկիզբ կային խորհրդարանի հնարավոր լուծարման մասին նման խոսակցություններ, բայց հետո դրանք կտրուկ փակվեցին, իսկ հիմա կարծես նախագահն իր քայլով և իշխող կուսակցությունը ցույց են տալիս, որ իրենք վարվելու են այնպես, ինչպես ցանկանում են։ Ընդ որում որևէ հիմնավորում դրա համար չի նշվում, ուղղակի նշվում է, որ առկա խորհրդարանը չի համապատասխանում Իլհամ Ալիևի հռչակած բարեփոխումների կուրսին։ Այսինքն բավականին զավեշտալի իրավիճակ է առաջացել։ Ինչ վերաբերում է ընդդիմադիր ճամբարին, ապա ավելի ազգայնական թևը որոշակի քննարկումների մեջ է։ Կարծում եմ՝ նրանք կփորձեն մասնակցել ընտրություններին, բայց չգիտեմ՝ որքանով է հնարավոր նրանց համախմբումն այս բարդ իրավիճակում։ Սովորաբար Ադրբեջանում որպես այդպիսին ընդդիմությունն առանձնապես չի համախմբվում, իսկ ավելի լիբերալ հայացքների տեր համարվող «REAL» շարժումը հայտարարել է, որ մասնակցելու է: Այստեղ խնդիրն ան է, որ արդյոք նրանց առաջնորդը՝ Իլգար Մամեդովը, որն իրավական խնդիրներ ունի, կկարողանա մասնակցել, թե ոչ։ Դա կախված է նաև ընտրությւոնների ժամկետներից։ Առողջապահության նախկին նախարար, նախկինում դատված Ալի Իսանովն իր կուսակցությունն է հիմնում և իմ կարծիքով ավելի կմիավորի իշխանություններից դժգոհ մնացած ներքին ուժերին։ Նախագահի աշխատակազմում նոր նշանակումներ տեղի ունեցան երկու օր առաջ։ Իշխանությունները նախիջևանյան կլանի բոլոր ներկայացուցիչներին հեռացնում են ղեկավար պաշտոններից և կարծում եմ՝ մնում է, որոշակի դժգոհ զանգված, որը փորձելու է ինչ-ինչ քայլեր ամեն դեպքում ձեռնարկել։ Մի քանի ընդդիմադիր ուժեր միավորող դեմոկրատական ուժերի ազգային խորհուրդն էլ հայտարարությամբ է հանդես եկել, որ համոզված են՝ նախքան արտահերթ ընտրությունների անցկացումը պետք է տեղի ունենա ընտրական օրենսգրքի փոփոխություններ։ Այսինքն նրանց պնդմամբ ընտրական օրենսգիրքը պետք է փոխվի, որից հետո ընտրությունները լինեն։ Հակառակ դեպքում սա դիտում են որպես կառավարման ամբողջ ուժը մեկ ընտանիքի ձեռքում կենտրոնացնելուն ուղղված քայլ։

- Իսկ եթե ընտրական օրենսգրքում փոփոխություններ չլինե՞ն։

- Ըստ էության նրանք չեն մասնակցի արտահերթ խորհրդարանական ընտրություններին։

- Ո՞ւմ հետ ենք մենք գործ ունենալու արդեն նոր խորհրդարանի ձևավորման դեպքում։ Արդյոք կարող ենք նոր պատգամավորներից սպասել, որ նրանք կողմնակից կլինեն Ղարաբաղյան հարցի խաղաղ ճանապարհով լուծմանը, թե՞ հակառակը։

- Իմ խորին համոզմամբ մենք գործ ենք ունենալու ավելի երիտասարդ, իշխող «Ենի Ազերբայջան» կուսակցության այսպես ասած երիտթևի հետ։ Վստահ եմ, որ նրանք չեն փայլելու ավելի ազատական հայացքներով։ Նրանք այն մարդիկ են, որ տարիներով հենց այդ քարոզչության մեջ են ապրել և մեծացել ու հավատում են դրան։ Բնականաբար նրանցից շատերը լեզուների կտիրապետեն և իհարկե երիտասարդ տարիքն իր նշանակությունն ունի, բայց այդքանով հանդերձ ակնկալել, որ մենք ավելի չափավոր և մեղմ քաղաքական գործիչների հետ ենք գործ ունենալու միամտություն է, նման բան չի լինելու։ Ընդհակառակը ես ունեմ մտավախություն, որ հետագայում նրանք էլ ավելի կկոշտացնեն իրենց դիրքորոշումները, որպեսզի հենց նախնական փուլում ապացուցեն հանրությանը, որ իրենք հավատարիմ են իրենց որդեգրած ռազմատենչ ուղուն։

- Իսկ դիվանագիտական հարթակներում դա հայկական կողմի համար բարդություններ չի՞ առաջացնի։

- Դա կախված է մեզանից, թե որքանով պետք է պատրաստված լինենք, տիրապետենք իրավիճակին, վերլուծենք այն թեզերը, որոնք հնարավոր է նոր ձևով փորձեն ասպարեզ նետել և իհարկե ուշիուշով իրադարձություններին հետևելով՝ մեր եզրակացություններն ու դրանից բխող գործողություններն անենք։ Կարծում եմ՝ մենք այդ հարցում շատ հետևողական ենք և որևէ խնդրի առաջ չենք կանգնի։

- Նախքան Զոհրաբ Մանցականյան և Էլմար Մամեդյարով հանդիպումը, տեղի կունենան Լավրովի այցը Ալիևի և Մամեդյարովի հետ։ Ունե՞ք կանխատեսումներ՝ օրակարգում ինչ հարցեր են լինելու։

- Պաշտոնական տեղեկատվությունն այնպիսին է, որ օրակարգում երկկողմ հարաբերություններին առնչվող հարցեր են, ինչպես նաև Ղարաբաղյան հիմնահարցը։ Ըստ էության ավելին այս պահի դրությամբ չեմ կարող նշել, որովհետև դեռ հանդիպումներ չեն եղել, որևէ նյութ չի հայտնվել և կդժվարանամ ավելի կոնկրետ ինչ-որ բան ակնկալել։

Հեղինակ՝ Հասմիկ Կոշկարյան

Աղբյուր` Փաստինֆո