Փաստ ինֆո

Հասարակության եկամուտներն ավելացնելու և մարդկանց սոցիալական վիճակը բարելավելու փոխարեն, կառավարությունը գնում է ճիշտ հակառակ ճանապարհով` մի բան էլ մեծացնում է հարկային բեռը։ Ու դա նախատեսում է անել է ոչ թե մեկ, այլ մի քանի ուղղություններով։ 

Առաջիկա երեք տարիներին եկամտային հարկը ընդամենը 3 տոկոսով նվազեցնելու դիմաց` կառավարությունը պատրաստվում է սահմանել 6 տոկոս առողջապահության հարկ, կտրուկ բարձրացնել գույքահարկը և վերադառնալ կուտակային կենսաթոշակային ֆոնդերին պարտադիր վճարվող նախկին 5 տոկոսին։

Եվ սա դեռ ամենը չէ։ Բայց դա էլ բավական է պատկերացնելու համար, թե ինչ է սպասվում հասարակությանը առաջիկա երկու-երեք տարում։ Հարկային ճնշումը գնալով մեծանալու է, իսկ մարդկանց եկամուտների ավելացման մասին որևէ խոսք չկա։

Եթե առողջապահության 6 տոկոսանոց հարկը կառավարությունը նախատեսում է մտցնել 2022թ., ապա գույքհարկի փոփոխությունը կկիրառվի 2021թ. սկսած։ Արդեն ընդունվել է օրենք` անշարժ գույքի գները շուկայականին առավելապես մոտեցնելու վերաբերյալ։ Դա այն օրենքն է, որը դառնալու է գույքահարկի բարձրացման հիմքը։ Վերագնահատումից և շուկայականին գրեթե հավասարեցնելուց հետո առկա անշարժ գույքը գրեթե ամբողջապես կմտնի հարկման տակ։ Դա կվերաբերի ինչպես թանկարժեք, այնպես էլ, այսպես ասած, էժան գույքին։

Որքան էլ կառավարությունը ժամանակին այս նախաձեռնությունը փորձում է հիմնավորել հարուստների դղյակները հարկելու անհագուրդ ցանկությամբ, այնուհանդերձ հետագայում ամեն ինչ արեց, որպեսզի դրա տակ հայտնվեն անխտիր բոլորը։ Ներկայացված նախաձեռնության արդյունքում անշարժ գույքի, այդ թվում` բնակարանների գույքահարկը մի քանի անգամով կբարձրանա։ Իհարկե, թանկարժեք գույքի նկատմամբ ճնշումը շատ ավելի մեծ կլինի, բայց դա ոչնչով չի թեթևացնելու երկու կամ երեք սենյականոց բնակարան ունեցող և մի կերպ իր գոյությունը պահպանող քաղաքացու հարկային բեռը։

Գույքահարկի սպասվող բարձրացման արդյունքում կառավարությունն ակնկալում է ապահովել բյուջետային լրացուցիչ մուտքեր։ Էական չէ, դա կլինի տեղական, թե պետական բյուջեի համար։ Էականն այն է, որ այդ գումարները դուրս են գալու հասարակության ոչ միայն հարուստ, այլև աղքատ խավի գրպանից։ Եվ կարևոր չէ, որ հարուստներն ավելի շատ են վճարելու։

Գույքահարկի բարձրացումը սպառնում է շատերին` հրաժարվել իրենց ունեցվածքից։ Խոսքը ոչ թե նորօրյա հարուստների, այլ այն քաղաքացիների մասին է, ովքեր ունեն նախկինից ժառանգած թանկարժեք գույք և հիմա ի վիճակի չեն լինելու վճարել դրա գույքահարկը։ Նրանց այլ բան չի մնալու անել, քան վաճառել այդ գույքը։

Թե դա ի՞նչ է ենթադրում, դժվար չէ պատկերացնել. տեղի է ունենալու սեփականության նոր վերաբաշխման` իր լուրջ հետևանքներով։
Հասարակության վրա հարկային բեռի ավելացման պակաս փոքր ճնշում չի առաջանալու նաև կուտակային կենսաթոշակային ֆոնդերի հետ կապված։ Այս տարվանից սկսած` կառավարությունը նախատեսում է աստիճանաբար վերադառնալ նախկին հարաբերակցությանը։

Ինչպես հայտնի է, իշխանափոխությունից անմիջապես հետո` հասարակության դժգոհություններին տուրք տալով, կառավարությունը որոշեց իր վրա վերցնել կուտակային ֆոնդերին աշխատավարձերից վճարվող 5-ից 2,5 տոկոսի փոխհատուցման պարտավորությունը։ Բայց հիմա դա այլևս արդիական չէ։ Արդեն հաջորդ տարվանից աշխատողների բեռը այս հատվածում կավելանա 1 տոկոսային կետով։ Այսինքն` այսօր գործող 2,5-ի փոխարեն նրանք կենսաթոշակային ֆոնդերին կվճարեն աշխատավարձի 3,5 տոկոսը։

Եվս մեկ-երկու տարի և ամբողջությամբ կվերականգնվի նախկին հարաբերակցությունը։ Ու դա կհամընկնի այն ժամանակահատվածի հետ, երբ կառավարությունը կսկսի գույքահարկի նոր դրույքաչափերի և առողջապահության հարկի կիրառումը։

Աղբյուր` Փաստինֆո