Փաստ ինֆո

Ես էլ կուզենամ իմ 4 տարի 3 ամսվա աշխատավարձն ու խրախուսումները տան և գնամ ինձ համար ընբոշխնեմ ձմեռային երեկոների հաճուքը Հայաստանի տարբեր գեղատեսիլ վայրերում։ Այս մասին ԱԺ պետաիրավական հանձնաժողովի նիստի ժամանակ ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառնալով ՍԴ դատավորների վաղ կենսաթոշակի անցնելու նախագծին։

Գևորգ Պետրոսյանը, դիմելով Արդարադատության նախարար Ռուստամ Բադասյանին, հարցրեց՝ արդյոք ՀՀ հարկատուները պատրաստ են աշխատանք չկատարող դատավորին կերակրել. «Դուք չե՞ք գտնում, որ մենք ընդհանրապես աղճատում ենք կենսաթոշակի իրավունքի ինստիտուտ։ Ես սովետական դարաշրջանի ուսանող եմ եղել և ինձ սովորեցրել են, որ կենսաթոշակը դա մարդու կատարած աշխատանքից, աշխատավարձից պահված գումարների փոխհատուցումն է օր ծերության։ Եվ հետո, որ ասում եք Սահմանադրական դատարանի ճգնաժամ, կոնկրետ ասեք՝ ինչ ճգնաժամի մասին է խոսքը»,-հավելեց Գևորգ Պետրոսյանը։

Նա ընդգծեց, որ ՍԴ-ում մեկ ճգնաժամ կա, ում անունըՎահե Գրիգորյան է. «Այդ ինչ օբյեկտիվ, անհնարին իրավիճակ է, և ՍԴ-ն չի կարողանում գործեր քննել և որոշումներ կայացնել»,-հավելեց պատգամավորը։

Ռուստամ Բադասյանը նկատեց՝ ճգնաժամ ասելով նկատի ունեն հանրության վերաբերմունքը դատական համակարգի վերաբերյալ, որը բազմաթիվ գնահատականներով, միջազգային կազմակերպությունների գնահատականներով արձանագրվել է տարիներ շարունակ. «Ճգնաժամ ասելով նկատի ունենք, որ սահմանադրական փոփոխությունները քննարկելիս 2015 թվականին ասել ենք, որ ՍԴ-ի մոդելը սխալ է և անհրաժեշտ է, որ առաջադրող մարմինները լինեն երեքը՝ դատավորների ընդհանուր ժողով, կառավարություն, նախագահ, այսինքն ՍԴ-ի ձևավորմանը ներառական մասնակցություն պետք է լինի, որպեսզի չլինի իրավիճակ, որ ՍԴ-ում ինչ-որ մեկ անձի քմահաճույքով կամ մեկ քաղաքական ուժի քմահաճույքով ձևավորվի ՍԴ»,-հավելեց նախարարը։

Անդրադառնալով հարկատուների պատրաստակամությանը՝ նախարարն արձագանքեց. «Ես գիտեմ հավաքագրված հարկերի արժեքը, հարկ վճարողի տեսանկյունից գիտեմ, աշխատել եմ ՊԵԿ-ում և շատ լավ գիտեմ հարկատուի վերաբերմունքն իր վճարած հարկին ու նպատակային ուղղություններին։ Որոշակի առումով մտահոգություն առաջացնում է, բայց հանրությանը պետք է տալ հաջորդ հարցը՝ որքա՞ն եք պատրաստ հարկ և աշխատավարձ վճարել այն պաշտոնատար անձանց, ում նկատմամբ վստահությունը ձեր կողմից ցածր է»,-նշեց նախարարը։

Մանրամասները՝ տեսանյութում

Հեղինակ՝ Հասմիկ Կոշկարյան

Աղբյուր` Փաստինֆո