Փաստ ինֆո

Այս տարվա 11 ամիսների ընթացքում ՀՔԾ քննիչների վարույթում քննվել է 656 քրեական գործ,որից 536-ի ընթացքն արդեն իսկ լուծվել է։ Այս մասին ՀՔԾ պետ Սասուն Խաչատրյանն ասել է այսօր ամփոփելով տարվա ընթացքում ՀՔԾ կատարած աշխատանքը։ 

Նրա հրապարակած տվյալների համաձայն՝ 115 անձի վերաբերյալ 71 քրեական գործ մեղադրական եզրակացությամբ ուղարկվել է դատարան, նախապատրաստվել են 439 նյութեր, հարուցվել է 261 քրեական գործ, իսկ վարույթում գտնվող քրեական գործերով վերականգնվել է 4331935000 ՀՀ դրամ, մինչդեռ՝ ՀՔԾ գոյության 11 տարիների ընթացքում վերականգնված ամբողջ գումարը կազմել է 597698000 ՀՀ դրամ։ «Ծառայությունում քննված որոշ քրեական գործերով բացահայտվել են պետության կամ համայնքի սեփականությունը հանդիսացող հարյուրավոր հեկտարներ ընդհանուր մակերեսով հողամասերի ապօրինի օտարման դեպքեր»,- ասաց Խաչատրյանը՝ նշելով,որ համապատասխան միջնորդություններ են ուղարկվել ՀՀ գլխավոր դատախազություն՝ պետական շահերի պաշտպանության հայց հարուցելու համար։

ՀՔԾ պետը նշեց, որ մամուլի հրապարակման հիման վրա քրեական գործի նախաքննության ընթացքում հաստատվել է Ծաղկաձորում 106 հկ անտառային ֆոնդի տարածքների ապօրինի յուրացման դեպքը, սակայն քրեական պատասխանատվության ենթարկելու վաղեմության ժամկետներն անցած լինելու հիմքով մեղավոր պաշտոնատար անձանց նկատմամբ քրեական հետապնդում չի իրականացվել, բայց նախաձեռնվել է այդ տարածքների վերադարձը պետությանը։ «Մեկ այլ քրեական գործով հիմնավորվել է նախկին վարչապետի մտերիմների կողմից հողամասեր ապօրինի յուրացնելու բազմաթիվ դեպքեր, որից միայն 7,5 հկ Դիլիջան համայնքում, 168 ՀԿ Արարատի մարզում»,- ասաց Խաչատրյանը՝ հավելելով, որ նախաձեռնվել է այդ տարածքների վերադարձը համայնքներին։ Նրա խոսքով՝ ծառայության վարույթում է գտնվում նաև «Հաղթանակ» զբոսայգու տարածքների ապօրինի յուրացման վերաբերյալ քրեական գործը, որի նախաքննությունը շարունակվում է։

Հեղինակ՝ Իզաբել Սահակյան

Աղբյուր` Փաստինֆո