Փաստ ինֆո

Միհրան Պողոսյանի խափանման միջոցը նոր չէ վերացվել։ Այս մասին լրագրողների հետ զրույցում ասաց ՀՀ գլխավոր դատախազ Արթուր Դավթյանը՝ նշելով, որ շարունակվում են քննարկումները ՌԴ-ում գործընկերների հետ։

«Քրեական գործը բավականին ակտիվ փուլում է գտնվում և չեմ բացառում, որ նոր՝ առավել ծանր հանցագործությունների դրվագներ կունենանք։ Բնականաբար հանցանքի ծանրությամբ պայմանավորված՝ հույս ունենք, որ մեր գործընկերները իրավական և արդարացի մոտեցում կցուցաբերեն »,- ասաց գլխավոր դատախազը։

Նրա խոսքով՝ Միհրան Պողոսյանի արտահանձման խիստ անհրաժեշտությունը դատախազությունը շարունակելու է հիմնավորել։
Դավթյանի խոսքով՝ կան որոշակի գործընթացներ, որոնք պետությունը չի կարող հրապարակել։

«Միջազգային համապատասխան կոնվենցիաներն արգելում են ապաստան տված երկրին կամ, երբ անձը դիմում է իրենց ապաստանի համար, այդ փաստը հրապարակել»,- ասաց գլխավոր դատախազը։

Ավելի վաղ տեղեկացրել ենք, որ ՌԴ-ում Միհրան Պողոսյանի նկատմամբ ընտրված խափանման միջոցը վերացվել է։ Հիշեցնենք, որ Միհրան Պողոսյանի հետախուզման մեջ գտնվելու մասին հայտարարվել էր ապրիլի 15-ին. ՀՔԾ-ի տարածած պաշտոնական հաղորդագրության համաձայն` քննիչը որոշում էր կայացրել ՀՀ դատական ակտերի նախկին գլխավոր հարկադիր կատարող Միհրան Պողոսյանին ՀՀ քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով մեղադրյալ ներգրավելու մասին: Նրա նկատմամբ որպես խափանման միջոց էր ընտրվել կալանավորումը:
«Փաստինֆո»-ն հայտնել էր, որ հետախուզման մեջ գտնվող Մ.Պողոսյանը ապրիլի 19-ի երեկոյան ձերբակալվել էր Ռուսաստանում։ Մեր աղբյուրների փոխանցմամբ՝ նա հայտնաբերվել էր Կարելիայի հանրապետությունում, որտեղ փորձել էր հյուրանոցում սենյակ ամրագրել։ Ավելի ուշ՝ ապրիլի 24-ին, Պողոսյանի ռուս փաստաբանը «Ռունա» պարբերականին հայտնել էր, որ իր պաշտպանյալը քաղաքական ապաստան ստանալու խնդրանքով դիմել է ՌԴ-ին:
Օգոստոսին հայտնի դարձավ, որ ՌԴ գլխավոր դատախազությունը մերժել է ՀՀ ԴԱՀԿ նախկին պետ Միհրան Պողոսյանին Հայաստան արտահանձնելու միջնորդությունը։ Նա Ռուսաստանում ժամանակավոր կացության իրավունք է ստացել։

Աղբյուր` Փաստինֆո